काठमाडौं: नेपाली कांग्रेसका महामन्त्री विश्वप्रकाश शर्माले विशेष महाधिवेशनका कारण पार्टी विभाजन नहुने स्पष्ट पारेका छन्।
बिहीबार सामाजिक सञ्जालमार्फत धारणा सार्वजनिक गर्दै महामन्त्री शर्माले विशेष महाधिवेशनले पार्टीलाई अझ सुदृढ र बलियो बनाउने विश्वास व्यक्त गरे। उनले बाध्यकारी परिस्थितिमा आह्वान गरिएको विशेष महाधिवेशन वैधानिक भएको दाबी गरेका छन्।
महामन्त्री शर्माले अहिलेको नेपाल भदौ २४ अघिको अवस्था जस्तो नरहेको उल्लेख गर्दै नयाँ सोच र दृष्टिकोणका साथ अघि बढ्नुपर्ने आवश्यकता औँल्याए। साथै, विशेष महाधिवेशन हस्ताक्षर गर्ने र नगर्ने सबैको साझा विषय भएको भन्दै यसले पार्टीलाई एकताबद्ध बनाउने मार्ग प्रशस्त गर्ने बताए।
उनले भनेका– ‘नेपाली काँग्रेसको पहिलो विशेष महाधिवेशनले नेपाली काँग्रेसलाई त्यो समयको सही मार्गमा सही ढङ्गले अघि बढ्न दुरदृस्टी र दृढ इच्छाशक्ति दिएको थियो । दोस्रो विशेष महाधिवेशन भिन्न राष्ट्रिय परिस्थिति र भिन्न आन्तरिक अवस्थाका बिचमा भइरहेको छ । यो संवेदनशील र ऐतिहासिक घडीमा हामीले एकातर्फ आन्तरिक एकतालाई सुदृढ बनाउने कार्य गरेर पार्टीभित्र नवीन आत्मविश्वास भर्नुछ । अर्कोतर्फ आजको नेपाल र अबको नेपालका बारे सुझबुझपूर्ण दृष्टि, योजना र सङ्कल्प अघि सारेर मुलुकको विश्वास जित्न नयाँ ढङ्गले अघि बढ्नु छ ।’
पार्टीको विधानमा भएको व्यवस्था कार्यान्वयन गर्नु पार्टी विभाजन गर्न नभएको उनले उल्लेख गरेका छन् । सबै प्रतिनिधिलाई महाधिवेशनमा उपस्थित हुन पनि आग्रह गरेका छन् ।
