३६ वर्ष ३ महिना ५ दिन शिक्षाको उज्यालो बालेर अवकाशमा शिक्षक खत्री

रामेछाप । मन्थली नगरपालिका वडा नं २ स्थित बाल ताम्राकौशी आधारभूत विद्यालयमा करिब ३६ वर्ष ३ महिना ५ दिनसम्म शिक्षण पेशामा समर्पित रही विद्यालयको सुरुवातदेखि हालसम्म प्रधानाध्यापकको जिम्मेवारी सम्हाल्दै आउनु भएका लेख बहादुर खत्री औपचारिक रूपमा सेवा निवृत्त भएक छन।
खत्रीको शिक्षकीय यात्रा पाठ्यपुस्तकमा सीमित नभई अनुशासन, संस्कार, नैतिकता र मानवताको पाठ विद्यार्थीहरूका मनमा रोप्ने अभियानजस्तै रह्यो। सरल स्वभाव, स्नेही व्यवहार र समर्पित अध्यापन शैलीका कारण उहाँ विद्यार्थी, अभिभावक तथा स्थानीय समाजका बीच प्रिय शिक्षकका रूपमा परिचित थिए।
उहाँको योगदानको कदरस्वरूप विद्यालय परिवार, अभिभावक, विद्यालय व्यवस्थापन समिति, स्थानीय समाज तथा पूर्व विद्यार्थीहरूको उपस्थितिमा सम्मानसहित विदाई कार्यक्रम सम्पन्न गरिएको हो। कार्यक्रममा सहभागी सम्पूर्ण गाउँवासी उहाँले विद्यालय र समाजमा पुर्‍याएको अमूल्य योगदान सम्झँदै भावुक बनेका थिए।
विदाई कार्यक्रममा बोल्दै प्रमुख अतिथि तथा वडा अध्यक्ष सुरेन्द्र बहादुर कार्कीले शिक्षक खत्रीले विद्यालय, विद्यार्थी र समाजप्रति पुर्‍याएको योगदान कहिल्यै भुल्न नहुने उल्लेख गर्नुभयो।
त्यसैगरी विद्यालय व्यवस्थापन समिति अध्यक्ष जनक खत्रीले ३६ वर्षभन्दा बढी समयसम्म शिक्षाको उज्यालो बाल्नु भएका शिक्षक खत्रीप्रति सम्मान व्यक्त गर्दै उहाँको उत्तरजीवन स्वस्थ, शान्त र प्रेरणादायी रहोस् भन्ने शुभकामना दिनुभयो। उहाँले लेख बहादुर खत्रीलाई केवल शिक्षक मात्र नभई समग्र गाउँ समाजको अभिभावकको रूपमा स्मरण गर्नुभयो।
कार्यक्रमपछि स्थानीय अभिभावक तथा विद्यार्थीहरूले बाजा–गाजासहित उहाँलाई घरसम्म पुर्‍याउँदै भावुक विदाई गरेका थिए।
३६ वर्ष ३ महिना ५ दिनको सेवापछि शिक्षण सेवाबाट अवकाश भए पनि शिक्षक लेख बहादुर खत्रीले छोडेका ज्ञान, संस्कार र प्रेरणाका पदचिन्हहरू विद्यालय र गाउँ समाजमा सधैं जीवित रहनेछन्।