काठमाडौँ: नेपाली कांग्रेसको विशेष महाधिवेशनअन्तर्गत आज बन्दसत्र सुरु हुँदैछ।
काठमाडौँको भृकुटीमण्डपमा हिजोदेखि जारी विशेष महाधिवेशनको आजको कार्यतालिका अनुसार बिहान १० बजेदेखि बन्दसत्र सञ्चालन गरिनेछ। महाधिवेशन प्रचारप्रसार समिति संयोजक सुभास पोखरेल का अनुसार भृकुटीमण्डपस्थित हलमा हुने बन्दसत्रको सुरुआत विशेष महाधिवेशनको कार्यविधि निर्माणबाट गरिनेछ।
त्यसपछि नौ वटा समूह गठन गरी चार प्रमुख विषयमा नीति मन्थन गरिने कार्यसूची तय गरिएको छ। बन्दसत्रमा विधान संशोधन, नीति र नेतृत्व, शासकीय सुधार तथा समसामयिक विषयहरूमा विस्तृत छलफल हुने पोखरेलले जानकारी दिए।
नीति मन्थनपछि नेतृत्व परिवर्तन गर्ने वा नगर्ने विषयमा पनि व्यापक छलफल हुने बताइएको छ। यदि नेतृत्व परिवर्तन गर्ने निर्णय भएमा निर्वाचन समिति गठन गरी थप प्रक्रिया अघि बढाइने उहाँले स्पष्ट पार्नुभयो। नयाँ कार्यसमिति निर्विरोध चयन हुने सम्भावना रहेकाले मतदानको अवस्था नआउने उहाँको धारणा छ।
यसैबीच, महाधिवेशन प्रतिनिधिको नाम दर्ता कार्यक्रम आज बिहान ११ बजेसम्म जारी रहनेछ। क्षेत्र तथा जिल्ला समन्वय समिति संयोजक युवराज पाण्डेयका अनुसार विभिन्न जिल्लाबाट अधिकांश प्रतिनिधि आज बिहान मात्रै काठमाडौँ आइपुगेकाले उहाँहरूलाई ११ बजेसम्म दर्ता गर्न पाउने व्यवस्था मिलाइएको हो ।
