काठमाडौँ: नेपाली कांग्रेसका महामन्त्रीद्वयको नेतृत्वमा आजदेखि काठमाडौँको भृकुटीमण्डपमा भइरहेको विशेष महाधिवेशनमा प्रतिनिधिहरूको नाम दर्ता प्रक्रिया सुरु भएको छ।
पक्षधर समूहको आयोजना रहेको दुईदिने महाधिवेशनको पहिलो दिन आठवटा स्टलमार्फत नाम दर्ता भएको हो।
बिहान ८ बजेदेखि सुरु हुने भनिएको प्रक्रिया वास्तविकतामा ९ बजेदेखि मात्रै सुरु भएको थियो भने १२:४५ बजेसम्ममा १,२१५ जनाको नाम दर्ता भइसकेको छ। कांग्रेसले प्रतिनिधिहरूको सुविधाका लागि कर्णाली र सुदूरपश्चिम, विदेशस्थित जनसम्पर्क समिति, भ्रातृ संस्था र शुभेच्छुक संस्था, उपत्यकाका काठमाडौँ, भक्तपुर र ललितपुर, र बाँकी पाँच प्रदेशका लागि छुट्टाछुट्टै स्टलको व्यवस्था गरेको छ।
देशभर चार हजार ७४३ महाधिवेशन प्रतिनिधि रहेका छन्। उद्घाटनअघि सहभागीहरूले काठमाडौँका विभिन्न स्थानबाट जुलुस निकाल्ने तयारी गरेका छन् भने दिउँसो १ बजे भृकुटीमण्डपमा उद्घाटन सत्र हुनेछ र त्यसपछि सभाहलमा बन्द सत्र सञ्चालन गरिने संयोजक युवराज पाण्डेयले जानकारी दिएका छन्।
