काठमाडौं: नेपाली कांग्रेसका कार्यवाहक सभापति पूर्णबहादुर खड्का ले पार्टी एकतामा नकारात्मक असर पर्ने कुनै पनि गतिविधि नगर्न विशेष महाधिवेशन पक्षधरहरूलाई आग्रह गरेका छन्।
सोमबार एक अपिल जारी गर्दै कार्यवाहक सभापति खड्काले पार्टीलाई एकताबद्ध रूपमा अगाडि बढाउन सबै पक्षलाई संयम र जिम्मेवारी देखाउन आग्रह गरेका हुन्। अपिलमा उनले पार्टी एकतालाई कमजोर पार्ने कुनै पनि कार्य नगर्न सबैसँग हार्दिक अनुरोध गरेका छन् ।
कांग्रेस राष्ट्रियता र लोकतन्त्रको धरोहरका रूपमा स्थापित भइसकेको उल्लेख गर्दै उनले पार्टीको काँधमा फेरि एकपटक ऐतिहासिक जिम्मेवारी आएको बताए। प्रतिनिधिसभा निर्वाचन सम्पन्न भएपछि आगामी २०८३ साल वैशाखमा पार्टीको १५औँ महाधिवेशन हुने र त्यसबाट नीतिगत सुधार तथा नेतृत्वको सहज परिवर्तन सुनिश्चित हुने अवस्था रहेको उनले स्मरण गराए।
कार्यवाहक सभापति खड्काले हालको प्रतिनिधिसभा निर्वाचनलाई केन्द्रमा राख्दै सम्पूर्ण पार्टी पंक्ति एकताबद्ध भई अभियानका रूपमा सक्रिय हुनुपर्ने आवश्यकता औँल्याए। उनले कांग्रेसका सबै सदस्य, केन्द्रीय कार्यसमितिका पदाधिकारी तथा सदस्य, महासमिति सदस्य, महाधिवेशन प्रतिनिधि, प्रदेश, जिल्ला, क्षेत्र, पालिका र वडा तहका पदाधिकारी तथा सदस्य, भ्रातृ तथा शुभेच्छुक संस्थाहरू र सहयोगी सबैले देशको विषम परिस्थितिप्रति गम्भीर हुँदै पार्टीभित्र देखिएका असहज अवस्थाको अन्त्य गर्न एकजुट हुनुपर्नेमा जोड दिएका छन्।
