काठमाडौँ: प्रमुख कार्यवाहक निर्वाचन आयुक्त रामप्रसाद भण्डारीले नेपाली कांग्रेसको आधिकारिकताबारे निर्वाचन आयोगले विधि र परम्पराअनुसार निर्णय गर्ने बताएका छन्।
शुक्रबार बिहान निर्वाचन आयोग पुगेका नेपाली कांग्रेसका सभापति शेरबहादुर देउवा पक्षका नेता तथा कार्यकर्तासँगको भेटमा कार्यवाहक प्रमुख निर्वाचन आयुक्त भण्डारीले आयोग संविधान, ऐन र कानुनको सीमाभित्र रहेर मात्रै विषयको विश्लेषण र निर्णय गर्ने बताएका हुन्।
उनले भने, “निर्वाचन आयोग संविधान, ऐन र कानुनको परिधिमा रहेर निर्णय गर्छ। विधि र पद्धतिबाहिर गएर आयोगले कुनै निर्णय गर्दैन। निर्वाचन कार्यतालिकाअनुसारका गतिविधिमा तपाईंहरू सहभागी हुनुहुनेछ भन्ने आयोगको विश्वास छ।”
यसैबीच, देउवा पक्षले विशेष महाधिवेशनको पक्षमा हस्ताक्षर गरेका ८८५ जनाले आफ्नो हस्ताक्षर फिर्ता लिएको प्रमाण निर्वाचन आयोगमा बुझाएको छ।
आयोगमा दलबलसहित पुगेका कार्यवाहक सभापति पूर्णबहादुर खड्काको नेतृत्वमा गएको टोलीले कार्यवाहक प्रमुख निर्वाचन आयुक्त रामप्रसाद भण्डारीलाई हस्ताक्षर फिर्तासम्बन्धी निवेदनसहितका प्रमाण बुझाएको हो।
