काठमाडौँ: राष्ट्रियसभामा रिक्त सदस्य चयनका लागि आज मतदान सुरु भएको छ। निर्वाचन आयोगका अनुसार बिहान ९ः०० बजेदेखि सुरु भएको मतदान दिउँसो ३ः०० बजेसम्म सञ्चालन हुनेछ।
२०८२ फागुन २० गतेदेखि राष्ट्रियसभाका १८ सिट रिक्त रहेका छन्। तीमध्ये कोशी प्रदेशको खस आर्य समूहअन्तर्गत एक पदमा नेपाली कांग्रेसका सुनिलबहादुर थापा निर्विरोध निर्वाचित भइसकेकाले बाँकी १७ पदका लागि आज निर्वाचन भइरहेको हो।
निर्वाचन आयोगका प्रवक्ता नारायणप्रसाद भट्टराईका अनुसार सातै प्रदेशका राजधानीमा तोकिएका मतदानस्थल र मतदान केन्द्रमा मतदान सुरु भइसकेको छ। कोशी प्रदेशमा विराटनगरस्थित प्रदेश निर्वाचन कार्यालय परिसर, मधेस प्रदेशमा जनकपुरधामको महेन्द्रनारायण निधि मिथिला संस्कृति केन्द्र, बागमती प्रदेशमा हेटौँडास्थित भुटनदेवी माध्यमिक विद्यालयमा मतदान भइरहेको छ।
त्यसैगरी गण्डकी प्रदेशको पोखरास्थित प्रदेश निर्वाचन कार्यालय, लुम्बिनी प्रदेशको घोराहीस्थित कर्मचारी मिलन केन्द्र, कर्णाली प्रदेशको वीरेन्द्रनगरस्थित प्रदेश निर्वाचन कार्यालय परिसर तथा सुदूरपश्चिम प्रदेशको धनगढीस्थित प्रदेश निर्वाचन कार्यालय परिसरमा मतदान जारी रहेको आयोगले जनाएको छ।
राष्ट्रियसभा सदस्य निर्वाचनमा प्रदेशसभा सदस्य तथा स्थानीय तहका प्रमुख, उपप्रमुख, अध्यक्ष र उपाध्यक्ष मतदाता रहने व्यवस्था छ। प्रदेशसभा सदस्यको मतभार ५३ र स्थानीय तहका प्रमुख तथा उपप्रमुखको मतभार १९ तोकिएको छ।
