काठमाडाैं: रामेछापको मन्थली नगरपालिका देशकै उत्कृष्ट नगरपालिका घोषित भएको छ। नेपाल नगरपालिका संघले आफ्नो ३३ औँ स्थापना दिवसका अवसरमा काठमाडौँमा आयोजित विशेष कार्यक्रममा मन्थलीलाई ‘उत्कृष्ट नगरपालिका पुरस्कार–२०८२’ प्रदान गर्दै सम्मानित गरेको हो।
आर्थिक वर्ष २०८१/८२ मा स्थानीय आर्थिक विकास क्षेत्रमा उल्लेखनीय उपलब्धि हासिल गरेको आधारमा मन्थली नगरपालिका उत्कृष्टको रूपमा छनोट भएको हो। देशभरका नगरपालिकाको विस्तृत अध्ययन, सर्वेक्षण र समग्र मूल्याङ्कनपछि संघले मन्थलीलाई यो सम्मानका लागि योग्य ठहर गरेको जनाएको छ।
संघले संस्थागत विकास, सेवा प्रवाह, वित्तीय सुशासन तथा स्थानीय आर्थिक विकासजस्ता प्रमुख सूचकका आधारमा उत्कृष्ट नगरपालिका छनोट गर्दै आएको छ।
कार्यक्रममा प्रतिनिधिसभाका सभामुख डोलप्रसाद अर्यालले मन्थली नगरपालिकाका प्रमुख लव श्रेष्ठलाई सम्मानपत्र तथा दोसल्ला प्रदान गरे। सम्मानपत्रमा मन्थलीले सुशासन, प्रभावकारी सेवा प्रवाह र स्थानीय आर्थिक विकासमा हासिल गरेको उपलब्धिको उच्च मूल्याङ्कन गरिएको उल्लेख छ।
सम्मान प्राप्तिपछि नगर प्रमुख लव श्रेष्ठले यस उपलब्धिलाई केवल पुरस्कार नभई नगरबासीको विश्वास, सहयोग र मेहनतको सम्मान भएको प्रतिक्रिया दिएका छन्।
