हेटौंडा/ निर्माण व्यवसायी संघ मकवानपुरले बिल भुक्तानीको माग गर्दै शुक्रबार सडक डिभिजन कार्यालय बागमती प्रदेश हेटौंडा मकवानपुरमा तालाबन्दीसहित धर्ना दिएको छ । असार मसान्तसम्म बिल भुक्तानी हुने भनिए पनि भुक्तानी नहुने भएपछि तालाबन्दी गरिएको संघका अध्यक्ष बाल गोपाल कँडेलले जानकारी दिनुभयो । २०८०/८१ को सडक डिभिजन अन्तर्गत आएको ठेक्का सम्झौता बमोजिम निर्माण व्यवसायीहरुले समयमा नै म्याद थप भई निर्माण कार्य सम्पन्न गरी बिल बिल पेश गरिसकेको छ । तर सडक विभागले २२ करोड रुपैयाँ भुक्तानी नगरेपछि बाध्यताले ताल्चा लगाउन निर्माण व्यवसायीहरु बाध्य भएको उहाँको भनाइ छ ।
बिल भुक्तानी नगरे सडकमा उत्रिने चेतावनी समेत दिएको छ । सडक डिभिजनले सपना/ सागर कन्स्ट्रक्सनलाई एक करोड ३५ लाख रुपैयाँ, निरिक्षा निर्माण सेवा प्रालिलाई एक करोड रुपैयाँ, मेरिना कन्स्ट्रक्सन प्रालिलाई एक करोड ४० लाख रुपैयाँ, डि.एस कन्स्ट्रक्सन/ मोना जेभीलाई एक करोड ५० लाख रुपैयाँ, एलाइैट/ मोना जेभीलाई एक करोड ५० लाख रुपैयाँ र पुल निर्माण कार्य (विभिन्न स्थानमा) १० करोड रुपैयाँ भिल भुक्तानी गर्न बाँकी छ । यस्तै स्थानीय तहबाट समेत बिल भुक्तानी नभएको व्यवसायीहरुको दाबी छ ।
