भोटेकोशी बाढीमा ज्यान गुमाएका मोक्तानको घरमा पुगे वडा सभापति घिसिङ

मन्थली । भोटेकोशीमा आएको बाढीमा परी ज्यान गुमाएका मन्थली नगरपालिका–११ का मिनराज मोक्तानको परिवारलाई भेटेर नेपाली कांग्रेसका स्थानीय नेताहरूले समवेदना व्यक्त गरेका छन्।
गत भदौ १० गते भोटेकोशीमा आएको बाढीमा परी चिलिमे हाइड्रोका कर्मचारीसमेत रहेका ३९ वर्षीय मोक्तान बेपत्ता भएका थिए। उनी हाइड्रोमा इलेक्ट्रीसियनका रूपमा कार्यरत थिए। बाढी गएको १९ दिनपछि सुरुङभित्र उनको शव फेला परेको थियो।
मोक्तानको मृत्युको शोकमा असोज १ गतेदेखि तामाङ समुदायको परम्पराअनुसार घरमा ‘ख्यावा’ सुरु गरिएको मन्थली नगरपालिका–११ का कांग्रेस नेता राम तामाङले जानकारी दिए।
शोकमा रहेका परिवारलाई भेटेर समवेदना व्यक्त गर्न मन्थली नगरपालिका–११ का कांग्रेस सभापति कारसाङ घिसिङ पनि मोक्तानको घर पुगेका थिए। घिसिङले अल्पायुमै मोक्तानको निधन हुँदा परिवारसँगै समाज नै दुःखी भएको बताए।
मोक्तानको परिवारलाई समवेदना दिन नेपाली कांग्रेस मन्थली नगरपालिका–११ का निवर्तमान सभापति प्रेम घिसिङ, कांग्रेस नेता रोशन खत्री तथा पत्रकार युवराज श्रेष्ठलगायत नेता घर पुगेका थिए।