रामेछाप, असार २३ — रामेछाप अस्पतालमा शुक्रबार सम्पन्न निशुल्क स्वास्थ्य शिविरमा २,०६१ जना सेवाग्राहीले विभिन्न विशेषज्ञ सेवा लिएका छन्।
निजामती कर्मचारी अस्पताल, रामेछाप नगरपालिका र रामेछाप अस्पतालको संयुक्त आयोजनामा आयोजित शिविरमा विभिन्न १३ प्रकारका विशेषज्ञ सेवा, परीक्षण तथा औषधि वितरण गरिएको थियो।
अस्पतालका निमित्त मेडिकल सुपरिटेन्डेन्ट डा. केशव श्रेष्ठका अनुसार शिविरमा हार्ड–जोर्नी तथा नशा रोगमा ११४, स्त्री तथा प्रसूति रोगमा १०५, छाला रोगमा १३४, नाक–कान–घाँटीमा १२९, आँखा सेवामा २४४, शल्यक्रिया सेवा ४०, फिजियोथेरापी १५४, मेडिसिन २९९, बालरोग ३५, मुटुरोग ८३, ईसिजी १३५, भिडिओ एक्सरे १७०, प्रयोगशाला १५४, र भिआइए परीक्षणमा ५९ जनाले सेवा लिएका थिए।
शिविरमार्फत दुर्गम क्षेत्रका बासिन्दालाई निःशुल्क, गुणस्तरीय र सहज सेवा पुर्याउने लक्ष्य लिइएको आयोजक संस्थाहरूले जनाएका छन्।
