रामेछापका एक युवकले सम्बन्ध बिग्रँदै गएको भन्दै आफ्नी प्रेमिकाको ज्यान लिएको स्वीकार गरेका छन्। रामेछापको मन्थली नगरपालिका-१३ का ३७ वर्षीय सन्तोष सुनारले ३३ वर्षकी प्रेमिका शर्मिला उप्रेतीको ३२ असारमा बनेपा नगरपालिका-१३ साँगामा रहेको भगवान थुम्की सामुदायिक वनमा हत्या गरेका हुन् ।
शर्मिलाको शव आइतबार दिउँसो काभ्रेको बनेपा नगरपालिका–१३ स्थित भगवान थुम्की सामुदायिक वनमा फेला परेको थियो। उनलाई सन्तोषले त्यहीँ लगेर हत्या गरेको प्रहरी अनुसन्धानबाट खुलेको छ। जिल्ला प्रहरी कार्यालय काभ्रेका सूचना अधिकारी मीनबहादुर घलेका अनुसार सन्तोषले ‘घुम्न जाऊँ’ भन्दै जंगल लगेका थिए।
जंगल पुगेर उनले सुरुमा मन्दिरमा गाडिएको लठ्ठी निकालेर शर्मिलामाथि प्रहार गरे। त्यसपछि कुर्ताको सल प्रयोग गरी उनको घाँटी बाँधेर हत्या गरेको प्रहरीको प्रारम्भिक अनुसन्धानले देखाएको छ।
हत्या पछिको फरार अवस्थाबाट सन्तोषलाई प्रहरीले नियन्त्रणमा लिइसकेको छ। प्रारम्भिक बयानमा उनले सम्बन्ध चिसिँदै गएपछि आवेगमा आएर यस्तो कदम चालेको बताएका छन्।
आरोपी सन्तोषलाई थप अनुसन्धानका लागि काभ्रेपलाञ्चोक जिल्ला अदालतबाट ४ दिनको म्याद थप भएको प्रहरीले जनाएको छ ।
शर्मिलाको हत्यापछि सन्तोषले आफूलाई पश्चाताप भएको बताएका छन ।
सँगै ज्यामी काम गर्ने उनीहरू दुई वर्षदेखि प्रेम सम्बन्धमा थिए । केही महिनादेखि विवाहको कुरा चल्न थालेपछि शर्मिला टाढिएको सन्तोषको भनाइ छ ।
