काठमाडौँ: आगामी फागुन २१ गते हुने प्रतिनिधि सभा निर्वाचनका लागि समानुपातिक प्रणालीतर्फका उम्मेदवारले आज अपराह्न ४ बजेसम्म उम्मेदवारी फिर्ता लिन सक्नेछन् ।
निर्वाचन आयोग ले जारी गरेको सूचनाअनुसार प्रतिनिधि सभा सदस्य निर्वाचनमा राजनीतिक दलहरूले पुस १३ र १४ गते पेस गरेको बन्दसूचीमा समावेश उम्मेदवारहरूले आयोगबाट स्वीकृत कार्यतालिकाअनुसार आफ्नो उम्मेदवारी फिर्ता लिन पाउने व्यवस्था गरिएको छ ।
यससम्बन्धी जानकारी सबै उम्मेदवारलाई गराइसकिएको निर्वाचन अधिकृत कृष्णबहादुर राउत ले बताए । उनका अनुसार आयोगको समानुपातिक निर्वाचन अधिकृतको कार्यालयमा आज बिहान १० बजेदेखि अपराह्न ४ बजेसम्म उम्मेदवारी फिर्ता लिन सकिनेछ ।
बन्दसूचीमा नाम समावेश भएका उम्मेदवारले उम्मेदवारी फिर्ता लिन चाहेमा प्रतिनिधि सभा सदस्य समानुपातिक निर्वाचन निर्देशिका, २०८२ को अनुसूची–१८ अनुसारको ढाँचामा निवेदन दिनुपर्नेछ । कुनै कारणले उम्मेदवार स्वयं उपस्थित हुन नसकेमा वारेसमार्फत पनि निवेदन दिन सकिने आयोगले जनाएको छ ।
कूल २७५ सदस्यीय प्रतिनिधि सभामा प्रत्यक्ष निर्वाचन प्रणालीबाट १६५ जना र समानुपातिक निर्वाचन प्रणालीबाट ११० जना निर्वाचित हुने व्यवस्था रहेको छ ।
