काठमाडौँ: निर्वाचन आयोगले निर्वाचन खर्च बैंक तथा वित्तीय संस्थाका खातामार्फत मात्रै गर्नुपर्ने बाध्यकारी व्यवस्था लागू गरेसँगै उम्मेदवारहरू धमाधम बैंक खाता खोल्न थालेका छन्। आयोगको नयाँ व्यवस्थाअनुसार राजनीतिक दल र उम्मेदवारले चुनावी खर्चका लागि छुट्टै बैंक खाता खोल्नुपर्नेछ। यसअनुसार हालसम्म ६७१ जना उम्मेदवारले बैंक तथा वित्तीय संस्थामा चुनावी खाता खोलेका छन्।
आयोगका सहसचिव तथा प्रवक्ता नारायणप्रसाद भट्टराईका अनुसार प्रत्यक्षतर्फका कुल ३,४०६ उम्मेदवारमध्ये ६७१ जनाले बैंक खाता खोलेको विवरण आयोगको प्रणालीमा प्राप्त भइसकेको छ।
यसअघि भएका निर्वाचनमा बैंक खातामार्फत खर्च गर्नुपर्ने व्यवस्था अनिवार्य थिएन। तर यस वर्षदेखि दल र उम्मेदवारले निर्वाचन खर्च अनिवार्य रूपमा बैंकिङ प्रणालीबाट गर्नुपर्ने नियम लागू गरिएको हो। यसले निर्वाचन खर्चलाई थप पारदर्शी बनाउने आयोगको विश्वास छ।
आयोगले भौगोलिक अवस्थाका आधारमा उम्मेदवारले अधिकतम रु २५ लाखदेखि ३३ लाखसम्म खर्च गर्न पाउने सीमा तोकेको छ। आर्थिक अनुशासन कायम गर्न यस्तो व्यवस्था गरिएको आयोगले स्पष्ट पारेको छ। आयोगका सचिव कृष्णबहादुर राउतका अनुसार कालीकोटजस्ता दुर्गम जिल्लाका सबै उम्मेदवारले बैंक खाता खोलिसकेका छन् भने सुगम जिल्लाका धेरै उम्मेदवारले अझै खाता नखोलेको अवस्था छ।
नेपाल राष्ट्र बैंकका अनुसार देशभरका ७५३ वटै स्थानीय तहमा बैंक तथा वित्तीय संस्थाका शाखा सञ्चालनमा छन्। आयोगले रु २५ हजारभन्दा बढीको रकम बैंक खातामार्फत मात्रै लिने र खर्च गर्ने व्यवस्था गरेको छ।
यसै सन्दर्भमा आयोगले सोमबार बैंक तथा वित्तीय संस्थाका प्रमुख कार्यकारी अधिकृतहरूसँग छलफल गरेको थियो। छलफलमा कार्यवाहक प्रमुख निर्वाचन आयुक्त रामप्रसाद भण्डारीले बैंकिङ प्रणालीमार्फत निर्वाचन खर्च गर्दा पारदर्शिता सुनिश्चित हुने बताए। बैंकसँगको छलफलमा हातहातमा नगद लिएर चुनावी खर्च गर्न नपाइने व्यवस्था गरिएको र त्यसका लागि आयोगले छुट्टै निर्देशिका तयार पारेको जानकारी पनि दिए।
