खिम्ती बिर्तामा सेवा बन्द गरिएको छ, सेवा दिदा धम्की सहनु पर्यो

रामेछाप, रामेछापको लिखुतामाकोशी गाउँपालिका ६ खिम्तीमा सडक निर्माण कार्य भइरहेका बेला केही स्थानीय व्यक्तिबाट यातायात सञ्चालनमा रोक लगाउनु भनेपछी बेणी त्रिवेणी यातायात प्रा.लि.ले सेवा बन्द गरिएको छ।
कम्पनीले लिखित सुचनामा सिमलडाँडा, बित्ता र नागथली क्षेत्रमा सडक निर्माण कार्य भइरहेकाले केही दिनका लागि यातायात सञ्चालन स्थगित गरिएको उल्लेख गरेको छ। यद्यपि वडा कार्यालय वा सम्बन्धित निकायबाट सेवा बन्द गर्न कुनै लिखित वा मौखिक सूचना नआएको अवस्थामा कम्पनीले गत साउन ३ गतेसम्म नियमित रूपमा सेवा दिइरहेको जनाएको छ।
सूचनाअनुसार, सेवा सञ्चालनका क्रममा केही स्थानीय व्यक्तिहरूले पटक–पटक फोन गरेर गाडी सञ्चालन बन्द गर्न दबाब दिएको र नमानिए सवारी साधन नियन्त्रणमा लिई कारबाही गर्ने धम्की दिएको कम्पनीको आरोप छ। त्यसपछि यात्रुहरूको सुरक्षालाई ध्यानमा राख्दै साउन ४ गतेदेखि सेवा बन्द गरिएको कम्पनीले जनाएको छ।
बेणी त्रिवेणी यातायातका महासचिव भीमबहादुर तामाङद्वारा हस्ताक्षरित सूचनामा यात्रुहरूलाई परेको असुविधाप्रति क्षमायाचना व्यक्त गरिएको छ। साथै, सडक निर्माणजस्ता संवेदनशील काम भइरहेका बेला सम्बन्धित वडा कार्यालय तथा जिम्मेवार निकायले स्पष्ट सूचना जारी गर्नुपर्ने समेत सुचना लिखिएको छ।