उदयपुर: उदयपुरको कटारी नगरपालिका–५ र ८ मा आएको हुरीबतासका कारण दुई जनाको मृत्यु भएको छ भने छ जना घाइते भएका छन्।
जिल्ला प्रहरी कार्यालयका अनुसार सोमबार साँझ आएको हुरीमा कटारी–८ थलियाटारकी ४९ वर्षीया मीनामाया तामाङको रुखको हाँगा लागेर ज्यान गएको हो। त्यस्तै कटारी–५ तीनकुने चोकस्थित राधाकृष्ण मन्दिर नजिकै सखुवाको रुख ढल्दा ६४ वर्षीय वीरेन्द्र चौधरीको मृत्यु भएको छ।
हुरीका कारण २० वर्षीया कमलाकुमारी पुलामी मगर, पाँच वर्षीया बिनिशा, २७ वर्षीय युवराज कार्की, प्रेमचन्द्र दनुवार, लीलबहादुर दनुवार र १६ वर्षीया अस्मिता परियार घाइते भएका छन्।
घाइतेमध्ये लीलबहादुर दनुवार र कमलाकुमारी पुलामी मगरलाई थप उपचारका लागि विराटनगर पठाइएको छ भने अन्य चार जनालाई सामान्य उपचारपछि डिस्चार्ज गरिएको प्रहरीले जनाएको छ।
प्रहरीका अनुसार शव परीक्षणको तयारी भइरहेको छ। हुरीबतास र वर्षाले कटारीको पहाडी क्षेत्रमा घरका छाना उडाउने लगायत सामान्य क्षति भएको विवरणसमेत आएको छ।
