शिक्षा सुधार्न शिक्षामा लगानी गर्नुपर्छ: अध्यक्ष सिग्देल

हेटौँडा । आधुनिक राष्ट्रिय माध्यमिक विद्यालय को शैक्षिक सभाहलका लागि २ सय ७० वटा कुर्सी हस्तान्तरण गरिएको छ। शुक्रबार हेटौँडा ४ का वडा अध्यक्ष नवीन सिग्देलको विशेष उपस्थितिमा कुर्सी हस्तान्तरण गरिएको हो।
वडा सचिव रामप्रसाद गुरागाईंका अनुसार करिब ५ लाख रुपैयाँ बराबरको कुर्सी विद्यालयलाई सहयोग स्वरूप उपलब्ध गराइएको हो। कुर्सी व्यवस्थापनपछि सभाहल सञ्चालनमा सहजता आएको प्रधानाध्यापक रामसागर गुरागाईंले जानकारी दिए।
कार्यक्रममा वडा सदस्य गीता त्रिपाठी, विद्यालय व्यवस्थापन समितिका अध्यक्ष महमद समिम, समाजसेवी भवानी शर्मा, टोल विकास नगर समन्वय समितिका महासचिव शिवहरी दाहाल, व्यवस्थापन समितिकी सदस्य रेणुका फुँयाललगाएतको उपस्थिति रहेको थियो।
वडा अध्यक्ष सिग्देलले विद्यालयको भौतिक पूर्वाधार सुधार, विज्ञान प्रयोगशाला विकास तथा शैक्षिक गतिविधिमा वडा कार्यालयले निरन्तर सहयोग गर्दै आएको बताउँदै शिक्षा क्षेत्रलाई उच्च प्राथमिकतामा राखिएको उल्लेख गरे।