काठमाडौं । राष्ट्रिय स्वतन्त्र पार्टी ९रास्वपा० का सभापति रवि लामिछानेले वर्तमान सरकारभन्दा प्रतिपक्ष राजनीतिक रूपमा अझ बलियो रहेको दाबी गरेका छन्।
नीति, संगठन तथा नेतृत्वसम्बन्धी कार्यशालामा केन्द्रीय सदस्यहरूलाई प्रशिक्षण दिँदै लामिछानेले रास्वपाले आफ्नो राजनीतिक गतिविधिलाई गाउँ–गाउँसम्म विस्तार गर्नुपर्ने बताएका हुन्। उनले सरकारका कामकारबाहीबारे जनतालाई जानकारी गराउन बस्ती–बस्तीमा पुग्न केन्द्रीय सदस्यहरूलाई आग्रह गरे।
लामिछानेले स्थानीय तहमा पार्टीको उपस्थिति बलियो बनाउन नसके राजनीतिक रूपमा पछि पर्ने चेतावनीसमेत दिए। उनले भने, “स्थानीय सरकारमा हामीले बलियो उपस्थिति बनाउन सकेनौं भने धेरै कुरामा हामी पछि पर्छौं। अहिले सरकार मात्र बलियो छैन, प्रतिपक्ष झन् बलियो छ। बलियो प्रतिपक्षलाई राजनीतिक तवरले काम गर्न सकेनौं भने त्यसले अर्कै ठाउँमा लिएर जान्छ।”
सुशासनको मुद्दालाई प्राथमिकतामा राख्दै आएको रास्वपाले अनियमितताका विषयमा निरन्तर प्रश्न उठाउँदै आएको उनले बताए। यद्यपि, प्रश्न उठाउने काम मात्र पर्याप्त नहुने उनको भनाइ थियो।
लामिछानेले आफू मधेश जाने तयारीमा रहेको जानकारी दिँदै केन्द्रीय सदस्यहरूलाई विभिन्न जिम्मेवारी दिएर गाउँ–गाउँमा परिचालन गर्ने बताए। उनका अनुसार पार्टीको संगठन विस्तारसँगै जनतासँग प्रत्यक्ष संवादलाई समेत प्राथमिकता दिइनेछ।
