सुर्खेत । वीरेन्द्रनगरको रेष्टुरेन्टबाट लागू औषध कारोबार भई रहेको अबस्थामा चार जना पक्राउ परेका छन् । कर्णाली प्रदेशको राजधानी सुर्खेतको कुईन्स रेष्टुरेन्टको क्याबिनमा लागू औषध कारोबार भई रहेको भन्ने बिशेष सूचनाको आधारमा प्रहरीले उनीहरुलाइ पक्राउ गरेकाे हाे ।
जिल्ला प्रहरी कार्यालय सुर्खेतका प्रवक्ता एवम् नायब उपरीक्षक रामप्रसाद घर्तीका अनुसार पक्राउ पर्नेहरुमा वीरेन्द्रनगर-१२ का ३० वर्षीय भुगोल गुरुङ र २२ वर्षीय बिप्लब सुबेदी, वीरेन्द्रनगर-१० बस्ने १८ वर्षीय युनिस नेपाली र वीरेन्द्रनगर-३ बस्ने १९ वर्षीय पुजा कार्की रहेका छन् ।
उनीहरूलाइ कर्णाली प्रदेश प्रहरी कार्यालय लागू औषध ब्युरोबाट र जिल्ला प्रहरी कार्यालय सुर्खेतबाट खटिएको टोलीले चेकजाँच गर्ने क्रममा लागु औषध (ब्राउन सुगर ) जस्तो देखिने खैरो धुलो पदार्थ सहित उनीहरुलाई फेला पारेको हो ।
उनीहरूकाे साथबाट प्रहरीले प्लाष्टिक सहित एकसय मिलि ग्राम र नाप तौल गर्दा शुद्ध ४० मिलि ग्राम लागू औषध (ब्राउन सुगर ) जस्तो देखिने खैरो धुलो पदार्थ फेला पारेकाे छ । पक्राउ परेकालाइ हिरासतमा राखेर थप अनुसन्धान शुरु गरिएकाे प्रहरीले जनाएको छ ।
