काठमाडौं । स्थानीय तहको निर्वाचनबारे छलफल गर्न निर्वाचन आयोगका पदाधिकारी बालुवाटार बोलाईएको छ । प्रधानमन्त्री शेरबहादुर देउवाले स्थानीय तहको निर्वाचनबारे छलफल गर्न आयोगका पदाधिकारीलाई आज (मंगलबार) ३ बजे बालुवाटार बोलाउनु भएको हो ।
गत शनिबार बसेको सत्तारुढ गठबन्धनको बैठकले जेठ भित्रै स्थानीय तहको निर्वाचन गर्ने निर्णय गरेको थियो । त्योहि निर्णयका अनुसार सरकारले निर्वाचन आयोगसँग छलफल गरेर मिति तोक्ने सम्बन्धमा छलफलका लागी प्रधानमन्त्री देउवाले पहिलो पटक आयोगका पदाधिकारीलाई बालुवाटार बोलाउनु भएको हो ।
निर्वाचन आयोगले स्थानीय तह निर्वाचन ऐन २०७३ अनुसार आगामी जेठ ५ गते देशभरका स्थानीय तहका जनप्रतिनिधिको कार्यकाल समाप्त हुनेछ । जनपर्तिनिधिको कार्यकाल समाप्त हुनु अगाडी नै निर्वाचन गर्न निर्वाचन आयोगले र प्रमुख प्रतिपक्ष दल नेकपा एमालेले दबाव दिदै आएका छन् ।
प्रधानमन्त्रीको सचिवालयले आयोगका पदाधिकारीलाई बालुवाटार बोलाइएको पुष्टि गरेको छ । आज (मंगलबार) ३ बजे प्रमुख निर्वाचन आयुक्त दिनेश थपलिया सहितका पदाधिकारीहरु प्रधानमन्त्री देउवासँग छलफलका लागी बालुवाटार जानेछन् ।
