प्रधानमन्त्री देउवा, दाहाल र नेपालबीच भेटवार्ता भएको छ । प्रधानमन्त्री एवं नेपाली कांग्रेसका सभापति शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल प्रचण्ड र नेकपा (एकीकृत समाजवादी)का अध्यक्ष माधवकुमार नेपालबीच प्रधानमन्त्री निवास बालुवाटारमा भेटवार्ता भएको हो ।
आज भएको भेटमा उहाँहरुबीच समसामयिक राजनीतिक विषयमा छलफल भएको प्रधानमन्त्रीका प्रेस प्रमुख गोविन्द परियारले जानकारी दिनुभयो । मुलुकमा पछिल्लोपटक मिलेनियम च्यालेन्ज कर्पोरेशन (एमसिसी) संसदबाट पारित गर्नुपर्ने विषयमा प्रमुख दलहरुबीच बहस जारी रहेका बेला गठबन्धन तिन पर्मुख पार्टिका पर्मुखहरुको यो भेटघाट अर्थपुर्ण मान्न सकिन्छ ।
यसैगरी सरकारले आगामी वैशाख ३० गते स्थानीय तहको निर्वाचन गर्ने निर्णय गरेपछि त्यसको तयारी र चुनाबमा गठबन्धन कायम राख्ने या छुट्टाछुट्टै जाने बारेमा सत्ता गठबन्धनका दलहरुबीच विभिन्न चरणमा छलफल पनि जारी छ ।
आज बिहान कांग्रेस नेता डा. शेखर कोइरालाले माओवादी केन्द्रका अध्यक्ष दाहालसँग उहाँकै निवासमा भेटेर एमसिसी, स्थानीय तहको निर्वाचन लगायत विषयमा कुरा गर्नुभएको नेता कोइरालाको सचिवालयले जनाएको छ ।
