काठमाडौं । नेपाल धितोपत्र बोर्ड (सेबोन) को अध्यक्षमा रमेशकुमार हमाल नियुक्तभएका छन् । आज (बिहीबार) बसेको मन्त्रिपरिषद्को बैठकले हमाललाई धितोपत्र बोर्डको अध्यक्षमा नियुक्त गरेको हो ।
यसअघि राष्ट्रिय योजना आयोगका उपाध्यक्ष डाक्टर विश्वनाथ पौडेलको संयोजकत्वमा गठित छनोट समितिले कृष्णराज पोखरेल, डाक्टर गोपाल भट्ट र रमेशकुमार हमालको नाम नेपाल धितोपत्र बोर्ड (सेबोन) को अध्यक्षका लागी सरकारलाई सिफारिस गरेको थियो ।
सिफरिस गरिएका तीन जनामध्ये सरकारले हमाललाई सेबोनको अध्यक्ष पदमा नियुक्त गरेको हो । धितोपत्र बोर्डका तत्कालिन अध्यक्ष भिष्मराज ढुंगाना सर्वोत्तम सिमेन्टको सेयर खरिद गरेका कारण उनलाई सेबोनको अध्यक्ष पदबाट सरकारले हटाएको थियो । हमालको कार्यकाल भने ४ वर्षको हुने छैन ।
नयाँ अध्यक्ष नियुक्ति गर्न बनेको छनोट समिति लामो समय विवादित पछि नेपाल स्टक एक्सचेञ्जका प्रमुख कार्यकारी अधिकृत र बोर्ड अध्यक्षमा सत्ता साझेदार दुई प्रमुख दल नेपाली कांग्रेस र नेकपा माओवादी केन्द्रबीच सहमति जुटेपछि बोर्ड अध्यक्ष नियुक्ति प्रक्रिया अघि बढेको थियो । प्रधानमन्त्री शेरबहादुर देउवाकै चाहनामा हमाल अध्यक्ष नियुक्त भएका स्रोतको भनाइ छ ।
