काठमाडौं । प्रतिनिधिसभाको बैठकमा एमसीसी सम्झौता टेबल हुने भएको छ । संघीय संसद सचिवालयका प्रवक्ता रोजनाथ पाण्डेका अनुसार सभामुख अग्निप्रसाद सापकोटाले बोलाएको कार्यव्यवस्था परामर्श समितिको बैठकले आइतबारको प्रतिनिधिसभा बैठकमा अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सम्झौता टेबल गर्ने निर्णय गरेको हो ।
कार्यव्यवस्था परामर्श समितिको निर्णयमा एमसीसी सम्झौतालाई संसदको कार्यसूचीमा राखिएको छ । साथै आइतबारको बैठकमा राष्ट्रियसभाबाट सन्देश सहित आएको लोकसेवा आयोग सम्बन्धी विधेयक पनि पेश हुने भएको छ ।
र, एमसीसीको विरोधमा प्रदर्शनमा उत्रिएकाहरुले निषेधित क्षेत्र तोडेका छन् । काठमाडौंको नयाँबानेश्वर क्षेत्रको अवस्था हाल तनावपूर्ण भएको छ ।
प्रहरीले सडकमा लगाएको बार पनि हटाएर प्रदर्शनकारी अघि बढेका छन् भने प्रहरीले प्रदर्शनकारी माथि पानीको फोहोरा हानिरहेको छ । केही प्रदर्शनकारीलाई प्रहरीले नियन्त्रणमा पनि लिएको छ ।
एमसीसी संसदमा टेबुल गर्ने निर्णय सत्ता गठबन्धनको बैठकले गरेको थियो । यो सगै नयाँबानेश्वर क्षेत्रमा विरोध प्रदर्शनका कारण काठमाडौं कै यातायात आवागमन प्रभावित भएको छ ।
