काठमाडौं । संसद भवनको बाहिरी घेराको पर्खालमा काँडेतार लगाईएको छ । बिहीबार बस्ने प्रतिनिधिसभा बैठकको समयमा हुनसक्ने आन्दोलन र यसबाट हुनसक्ने सम्भावित जोखिमलाई ध्यानमा राखी संसद् भवनको बाहिरी घेरामा रहेको पर्खालमा काँडेतार बेरिएको हो ।
अमेरिकी सहयोग परियोजना एमसीसी संसद्मा सोमबार टेबल भएपछि संसद् भवन आसपासमा यसको बिरोधमा प्रदर्शन भईरहेको छ । भेली पनि हुनसक्ने प्रदर्शनलाई मध्यनजर गर्दै संसद् भवनको सुरक्षा पनि थप मजबुद बनाइएको छ ।
एमसीसीको पक्षमा रहेको नेपाली कांग्रेसका अध्यक्ष तथा प्रधानमन्त्री शेरबहादुर देउवाले गठबन्धन पार्टिका प्रमुख तथा प्रमुख प्रतिपक्ष दल नेकपा एमाले अध्यक्ष तथा पुर्व प्रधानमन्त्री केपी शर्मा ओली सँग समानान्तर बैठक गरिरहेका छन् ।
प्रधानमन्त्रीको छलफलको क्रमलाई हेर्दा देश एमसीसीकै सेरोफेरो घुमेको र बिहीबारको संसद् बैठकमा अर्थमन्त्री जनार्दन शर्माले एमसीसी सम्झौतामाथि छलफल गरियोस् भनी प्रस्ताव पेश गर्ने सम्भावित कार्यसूची छ ।
सत्तारुढ नेकपा माओवादी केन्द्र र एकीकृत समाजवादीका भ्रातृ संगठन, राप्रपा लगायतका अन्य दलहरुले विरोध गरीरहेका छन् । उनीहरु संसद भवनलाई केन्द्रित गरी नयाँ बानेश्वर क्षेत्रमा विरोध गर्दै आईरहेका छन् ।
