काठमाडौं । ओलीले बुधबार पार्टीका स्थानीय तहका अध्यक्षहरूलाई सम्बोधन गर्ने भएका छन् । नेकपा एमालेका अध्यक्ष केपी शर्मा ओलीले बुधबार पार्टीका स्थानीय तहका अध्यक्षहरूलाई भर्चुअल माध्यमबाट सम्बोधन गर्ने भएका हुन् ।
अध्यक्ष ओलीले दिउँसो १ बजे जिल्ला पदाधिकारी, प्रदेश पदाधिकारी, नगर प्रमुख र उपप्रमुखहरुलाई भर्चुअल माध्यमबाट सम्बोधन गर्ने छन् । एमाले नेता विष्णु रिजालका अनुसार ओलीले स्थानीय तहको निर्वाचनमा पार्टीलाई पहिलो बनाउनेगरी खट्न निर्देशन दिनेछन् ।
गत साता सम्पन्न केन्द्रीय कमिटीको बैठकमा ओलीले एमालेको पाखुरा देखेर कांग्रेस सभापति शेरबहादुर देउवा डराएको बताएका थिए । दलहरुको गठबन्धन बनाएर आएपनि निर्वाचनमा एमालेले गठबन्धनलाई पराजित गर्ने दाबी गरेका थिए ।
नेपाली कांग्रेसको केन्द्रीय समितिको बैठकले गठबन्धनलाई चुनावमा पनि कायम राखेर जाने निर्णय गरिसकेको छ ।
