काठमाडौं । नेपाल ललितकला प्रज्ञा प्रतिष्ठान तथा बागमती प्रदेशको रामेछापस्थित सुनापति गाउँपालिकालाई थाङ्काको हब बनाउने विषयमा प्रस्ताव भएको छ ।
प्रतिष्ठानका कुलपति नारदमणि हार्तम्छालीको संयोजकत्वमा उपकुलपति लालकाजी लामा, गाउँपालिकाका अध्यक्ष ठूलो कान्छा तामाङ, अग्रज कलाकार तथा सुनापति गाउँपालिकाका उपकुलपति मानबहादुर दोङ र प्रतिष्ठानका प्राज्ञ परिषद् सदस्यहरुको उपस्थितिमा गाउँपालिकामा उक्त काम अघि बढाउन सोमबार छलफल भएको हो । प्रतिष्ठानले देशभरका विभिन्न ७ स्थानमा कलाको हब बनाउन योजना अघि सारेको छ ।
गाउँपालिकालाई थाङ्काको हब बनाई थाङ्कामार्फत सो गाउँपालिकालाई देश तथा विदेशमा पहिचान दिलाउने, गाउँपालिकालाई आन्तरिक र बाह्य पर्यटकको गन्तव्य बनाउने र सो गाउँपालिकाले थाङ्काको क्षेत्रमा देशकै प्रतिनिधित्व गर्नसक्ने गरी विकास गर्ने विषयमा समेत परिचर्चा गरिएको थियो । यसका सम्बन्धमा सम्भाव्यता अध्ययन गरी प्रतिवेदन पेश गर्न उपकुलपति दोङ संयोजक, नेपाल ललितकला प्रज्ञा प्रतिष्ठान परम्परागत चित्रकला विभाग प्रमुख प्राज्ञ पाल्साङ्मो लामा सदस्य, गाउँपालिकाका वडा नं.४ का वडा अध्यक्ष डुण्डुप लामा सदस्य, प्रतिष्ठानका प्राज्ञसभा सदस्य निरिमाया लामा सदस्य, गाउँपालिकाका शिक्षा शाखा प्रमुख कमलबहादुर बम सदस्य रहेको सम्भाव्यता अध्ययन विज्ञ कार्य टोली रहने बताइएको छ । यस टोलीले तोकिएको विषयमा अध्ययन गरी भदौ १५ गतेभित्र नेपाल ललितकला प्रज्ञा प्रतिष्ठान तथा सुनापति गाउँपालिकामा प्रतिवेदन पेश गर्नेछ ।
सम्भाव्यता अध्ययन विज्ञ कार्य टोलीको अनुगमन र सुपरिवेक्षण प्रतिष्ठानका उपकुलपति लामा, गाउँपालिकाका अध्यक्ष तामाङ र उपाध्यक्ष गीता विष्ट रहेको टोलीले गर्नेछ । प्रतिष्ठानका अनुसार यसपछि गाउँपालिकामा रहेका ललितकलाका विभिन्न क्षेत्रहरु मुख्यतः थाङ्का कलालाई विस्तार तथा प्रवर्द्धन गर्नका लागि नीतिगत एवम् योजनागत छलफल अघि बढ्दै जानेछ ।
