शर्मिला बिसुन्के,रामेछाप।
रामेछापको मन्थली नगरपालिकाका १४ वटै वडाहरुमा आज २१ देखि २३ गते सम्म दादुरा– रूबेला खोप अभियान सुरु भएको छ । देशभर संचालनमा रहेको उक्त खोप अभियान मन्थलीमा भोली २१ गते देखि ३ दिन संचालन हुने भएको हो । आज आइतबार नगरपालिकाले आयोजना गरेको खोप संचालन सम्बन्धि अभिमुखिकरण कार्यक्रममा स्वास्थ्य शाखा प्रमुख केशब फ्युयालले खोप अभियान संचालन सम्बन्धि जानकारी दिँदै मन्थली नगरपालिकाका विभिन्न ४१ वटा खोप केन्द्रहरुमा खोप अभियान संचालन हुने बताउनुभएको हो । त्यसैगरी खोप अभियान अन्तर्गत मन्थली नगरपालिकामा ४६ जना स्वास्थ्यकर्मी र ९२ जना स्वास्थ्य स्वयंसेवकहरु खटिने फुयालले जानकारी दिनुभयो । खोप अभियानका ९ महिना देखि ५ बर्ष सम्मका बालबालिकालाई खोप प्रदान गरिने छ भने यस अघि खोप लगाइसकेका बालबालिकाले पनि यस अभियानमा खोप लगाउन सकिने स्वास्थ्य शाखा प्रमुख फ्युयालले जानकारी दिनुभयो ।
कार्यक्रममा मन्थली नगरपालिका प्रमुख लब श्रेष्ठले स्वास्थका विषयमा गम्भीर विषय भएकाले यस अभियानलाई सफलता पुर्वक संचालन गर्ननगरको सबै संरचनाहरु आ- आफ्नो क्षेत्रबाट लागिपर्न आग्रह गर्नुभयो ।
त्यसैगरी नगरपालिकाका प्रशासकीय प्रमुख हरि प्रसाद चापागाईंले खोप लगाउन छुट्न सक्ने बालबालिकाको क्षेत्रलाई ध्यान दिएर स्वास्थ्यकर्मी, जनप्रतिनिधि तथा सबै सरोकारहरुलाई चनाखो भएर लाग्न आग्रह गर्नुभयो ।
