हेटौंडा/ मकवानपुर जिल्लामा सवारीसाधन दुर्घटना भयावह बन्दै गएको छ । जिल्ला ट्राफिक कार्यालय मकवानपुरका प्रमुख बसन्त आचार्यले सडक सुरक्षाबारे सहजीकरण गर्दै यस्तो जानकारी दिए। २०७७/७८ मा ३ सय ७१, २०७८/७९ मा ४ सय ६४, २०७९/८० मा ३ सय ६३ र २०८०/८१ मा २ सय ३२ वटा सवारीसाधन दुर्घटनामा परेका छन् ।
जिल्ला समन्वय समिति मकवानपुरले मंगलबार विपत व्यवस्थापन तथा वातावरण संरक्षण सम्बन्धी आयोजना गरिएको अन्तरक्रिया कार्यक्रम उनले यस्तो बताएका हुन् । जिल्ला समन्वय समिति मकवानपुरका प्रमुख ललित घलानको सभाध्यक्ष तथा बागमती प्रदेशसभा सदस्य प्रेमबहादुर पुलामी(छिन्दु) को प्रमुख आतिथ्यतामा कार्यक्रम भएको हो । कार्यक्रमलाई सम्बोधन गर्दै सदस्य पुलामीले विकाससँगै विनाश पनि निम्त्याएको रहेको जानकारी दिए । विपतबाट हुने नोक्सानलाई कम गर्न सबै लाग्न आग्रह समेत गरे ।
सोही अवसरमा भू तथा जलाधार व्यवस्थापन कार्यालयकी वरिष्ठ जलाधार व्यवस्थापन अधिकृत सृजना गुरुङले पानी, विपद् जोखिम न्यूनीकरण तथा व्यवस्थापन ऐन-२०७४ बारे सहजीकरण गरिन् । यसैगरी वन डिभिजन कार्यालय मकवानपुरका वन अधिकृत बसन्तराज गाैतमले विपत व्यवस्थापन र वातावरण संरक्षणबारे सहजीकरण गरे । उनले वन डढेलो बढ्दै गएको बताए । कार्यक्रम बागमती गाउँपालिकाका अध्यक्ष सर्केश घलान लगायतको उपस्थिति थियो ।
