काठमाण्डाै । नेपाल प्रहरीले चार किलो पाँच सय चार ग्राम लागूऔषध कोकिनसहित चार जना विदेशी नागरिकलाई पक्राउ गरेर आज सार्वजनिक गरेको छ ।
नेपाल प्रहरीकाे लागूऔषध नियन्त्रण ब्युरोले पत्रकार सम्मेलनमार्फत उनीहरूलाई आज सार्वजनिक गरेको हो । ब्युरोका सहायक प्रवक्ता प्रेमबहादुर शाहीले गएको जेठ २७ गते फ्लाई दुबईको उडानबाट नेपाल आएका तान्जानियाका नागरिकलाई ठमेलबाट कोकिनसहित पक्राउ गरिएको बताउनुभयो । यस्तै जेठ ३० गते ब्राजिल हुँदै नेपाल आएकी ३३ वर्षकी बोलिभियन नागरिक र असार १ गते कतार एअरको उडानबाट नेपाल आएका भेनेजुयलाका नागरिकलाई पक्राउ गरिएको प्रहरीले जनाएको छ ।
उनीहरूले ल्याएको कोकिन भारत लैजाने क्रममा मिजोरमकी लालरु अतसङ्गीलाई पनि प्रहरीले पक्राउ गरेको छ । बरामद गरिएको लागूऔषध कोकिनको अवैध बजार मूल्य अन्दाजी १५ करोड ७६ लाख रुपैयाँ बराबर रहेकोले प्रहरीले जनाएको छ ।
