सुर्खेत । कर्णाली प्रदेशका पाँच जिल्लामा कोराेना सङ्क्रमण शून्य देखिएको छ । प्रदेश स्वास्थ्य सेवा निर्देशनालयले शनिबारसम्म प्रदेशका पाँचवटा जिल्लामा सङ्क्रमण शून्य देखिएको जनाएको हाे निर्देशनालयका अनुसार कालीकोट, जाजरकोट, डोल्पा, मुगु र हुम्लामा कोराेना सङ्क्रमण शून्य रहेको हो ।
अहिले कर्णाली प्रदेशमा ३३ जना कोराेनाका सक्रिय सङ्क्रमित रहेका छन् । पछिल्लो समय कोराेना सङ्क्रमणको दरमा धेरै कमी आएको निर्देशनालयको भनाइ छ । सुर्खेत, सल्यान, दैलेख, रुकुमपश्चिम र जुम्लामा कोराेना सङ्क्रमितको सङ्ख्या भए पनि कम रहेको छ । सक्रिय सङ्क्रमितमा पनि अधिकांश सङ्क्रमित होम आइसोलेसनमा रहेका छन् ।
निर्देशनालयले ३० जना होम आइसोलेसनमा र तीन जना अस्पतालमा उपचारमा रहेको जानकारी दिएको छ । सबैभन्दा बढी सुर्खेतमा ११ जना सङ्क्रमित होम आइसोलेसनमा र एक जना प्रदेश अस्पतालमा उपचारत छन् । दैलेखमा एक जना, सल्यानमा १३ जना, रुकुमपश्चिममा तीन जना होम आइसोलेसनमा छन् ।
यस्तै जुम्लामा दुई जना होम आइसोलेसन र दुई जना कर्णाली स्वास्थ्य विज्ञान प्रतिष्ठानमा उपचारत छन् । स्वास्थ्य निर्देशनालयका निर्देशक डा. रविन खड्काले कोराेना सङ्क्रमितको सङ्ख्यामा कमी आएको बताए । उनका अनुसार कोराेना सङ्क्रमितको सङ्ख्यामा कमी आएसँगै प्रदेशका विभिन्न अस्पताल तथा आइसोलेसन सेन्टरमा रहेका सबै आईसीयू र भेन्टिलेटर बेड खाली छन् ।
यद्यपि कोराेना सङ्क्रमितको सङ्ख्यामा कमी आए पनि जोखिम भने कायमै रहेको उनको भनाइ छ । कोराेना सङ्क्रमितका लागि प्रदेशभर छुट्याइएका ५७ आईसीयू र ३७ वटा भेन्टिलेटर खाली छन् ।उनले स्वास्थ्य मापदण्ड पालना गर्न छोडेकाले जोखिम कायमै रहेको बताए । उनले सबैले जनस्वास्थ्यका मापदण्ड पालना गर्न समेत आग्रह गरे । कर्णाली प्रदेशमा हालसम्म ३३ हजार ४८३ जनामा कोराेना सङ्क्रमण पुष्टि भएको छ । निर्देशनालयले अहिलेसम्म ३२ हजार १०७ जना कोराेना सङ्क्रमणमुक्त भएको जनाएको छ ।
