काठमाडौं: चैत्र १५ गते तीनकुनेमा तीनकुनेमा भएको राजावादीको प्रदर्शनका क्रममा भाटभटेनी सुपरमार्केटमा घुसेर लुटपाट गर्न खोज्ने व्यक्तिहरूलाई सुरक्षा गार्डले लट्ठीले प्रहार गर्दै लखेटेको एउटा साहसिक कार्यको रूपमा उभिएको छ। यस घटनामा भाटभटेनीको सुरक्षा गार्ड दुलप्रसाद पराजुलीको साहसिकता विशेष चर्चामा आएको छ।
उक्त घटनामा पराजुलीले लुटपाट गर्न प्रवेश गरेका व्यक्तिहरूलाई सशक्त प्रतिरोध जनाउँदै, लठ्ठीले हान्दै भाटभटेनीको सम्पत्ति र ग्राहकहरूको सुरक्षा गरेका थिए। पराजुलीको यो साहसिक कदमको कदर गर्दै भाटभटेनीले उनलाई ५ लाख ११ हजार १ सय ११ रुपैयाँसहित सम्मान गरेको छ। साथै पाँच ग्रेड बढुवा दिने निर्णय गरेको छ।
भाटभटेनीका अध्यक्ष तथा प्रबन्ध निर्देशक मिनबहादुर गुरुङले दुलप्रसाद पराजुलीलाई सम्मानसहित चेक प्रदान गरेका हुन्। भाटभटेनीले सोहि समयमा खटिएका अन्य सुरक्षा गार्डहरूलाई पनि जनही २५ हजार पुरस्कारसहित सम्मान गरेको छ।
यस घटनामा भाटभटेनी सुपरमार्केटले ८० लाख रुपैयाँ बराबरको क्षति व्यहोरेको जनाएको छ।
