रामेछाप । मन्थली नगरपालिका–१२, गेलु सिक्रालमा पारिवारिक विवादले भीषण रूप लिँदै ससुराले धारिलो हतियार प्रयोग गरी आफ्नै बुहारीको हत्या गरेका छन्।
नेपाली सेनाका पूर्वकर्मी मटक बहादुर बुढाथोकीले शुक्रवार साँझ करिब ४ः३० बजे अन्दाजी ३० वर्षीया बुहारी पवित्र बुढाथोकीको हत्या गरी खिम्ती प्रहरी चौकीमा आत्मसमर्पण गरेका हुन्। स्थानीयवासी लबहरि बुढाथोकीका अनुसार, मृतकको हात शरीरबाट छुट्टिएको अवस्था रहेको छ। घटनास्थलमा सर्वसाधारणलाई प्रवेश निषेध गरिएको छ।
घटनाको पृष्ठभूमिमा गएको साउन ३ गते मृतकको श्रीमान दीपेन्द्र बुढाथोकीले काठमाडौँमा आत्महत्या गरेपछि सुरु भएको तनाव रहेको बताइएको छ। छोरा गुमाएपछि ससुरा र बुहारीबीच नातिको हक र राज्यद्वारा प्राप्त हुने सहायता राशिलाई लिएर विवाद चर्किएको थियो।
जिल्ला अदालतले हालै नातिको जिम्मा आमालाई दिने आदेश दिएपछि, बच्चा लिन ससुरा बस्ने घर पुगेकी पवित्रमाथि हमला भएको प्रारम्भिक अनुमान छ।
