भक्तपुर, जेठ २५ – आदिवासी जनजाति पत्रकार महासङ्घ (फोनिज) बागमती प्रदेशको आयोजनामा “पत्रकारितामा कृत्रिम बुद्धिमत्ता (एआई) को प्रयोग” विषयक दुई दिने तालिम सफलतापूर्वक सम्पन्न भएको छ।
बागमती प्रदेश सरकारअन्तर्गत आन्तरिक मामिला तथा कानुन मन्त्रालयको सहयोगमा आयोजित तालिम जेठ २३ र २४ गते भक्तपुरमा सम्पन्न भएको हो।
तालिमको उद्घाटन मध्यपुर ठिमी नगरपालिकाका प्रमुख सुरेन्द्र श्रेष्ठले गर्नुभएको थियो। कार्यक्रममा फोनिजका संघीय महासचिव तथा प्रशिक्षक समिर बालामी विशेष अतिथिका रूपमा सहभागी हुनु भएको थियो भने अध्यक्षता फोनिज बागमती प्रदेश अध्यक्ष युवराज श्रेष्ठले गर्नुभएको थियो। साथै, तामाङ पत्रकार संघका साइला लामा र नेवा पत्रकार राष्ट्रिय दबुका नृपेन्द्रलाल श्रेष्ठले शुभकामना मन्तव्य राख्नुभएको थियो।
बागमती प्रदेश अन्तर्गतका काठमाडौ, ललितपुर, भक्तपुर, सिन्धुपाल्चोक, काभ्रेपलाञ्चोक, चितवन, मकवानपुर, नुवाकोट, रसुवा, धादिङ, रामेछाप, सिन्धुली र दोलखा जिल्लाबाट सहभागी पत्रकारहरूको उपस्थिति उल्लेखनीय थियो। सहभागीहरूमा फोनिजका सदस्यहरूका साथै प्रविधिप्रति चासो राख्ने सञ्चारकर्मीहरूको उपस्तिथि रहेको थियो।
कार्यक्रममा प्रशिक्षक समिर बालामीले समाचार लेखन, अनुसन्धान, डाटा विश्लेषण, तथ्य जाँच (fact-checking), र बहुभाषिक अनुवादमा एआईको प्रयोगबारे व्याख्या गर्नुका साथै व्यावहारिक अभ्याससमेत गराउनु भयो। उहाँले एआईबाट पत्रकारितामा आउने फाइदा र चुनौतीहरूबारे पनि छलफल समेत गर्नुभयो।
कार्यक्रमको समापन सत्रमा बागमती प्रदेश सभा सदस्य सुरेश श्रेष्ठ प्रमुख अतिथिका रूपमा रहनुभएको थियो। उहाँले सहभागीहरूलाई प्रमाणपत्र वितरण गर्दै यस्ता तालिमहरूलाई राज्यका नीतिगत तहमा प्राथमिकतामा राखिनुपर्ने धारणा व्यक्त गर्नुभयो।
फोनिज बागमती प्रदेश अध्यक्ष युवराज श्रेष्ठले तालिमले आदिवासी जनजातिका पत्रकारहरूलाई डिजिटल युगअनुसार अपडेट हुन मद्दत गर्ने विश्वास व्यक्त गर्दै आगामी दिनहरूमा अझ व्यापक तालिम आयोजना गरिने जानकारी दिनुभयो।
