रामेछाप, असार १० ,
शिक्षा भनेको केवल पाठ्यक्रममा सिमित हुने विषय होइन, यो व्यक्तित्व, समाज र राष्ट्र निर्माणको आधार हो। यही आधारमा गोकुलगंगा गाउँपालिकाले १७औँ गाउँसभा तथा अधिवेशनको अवसरमा शिक्षा क्षेत्रमा देखाएको सरोकार, सम्मान र संकल्प साँच्चिकै अनुकरणीय छ।
यसपटक गाउँपालिकाले कक्षा ५ र ८ का पालिका स्तरका परीक्षामा उत्कृष्ट नतिजा ल्याउने विद्यार्थीहरूलाई दोसल्ला ओढाएर, कदरपत्र र नगद राशिसहित सम्मान ग-यो। शिक्षामा अनुशासन र निरन्तरताको प्रतिफलस्वरूप विद्यार्थीहरूलाई दिइएको यो सम्मान न केवल उनीहरूको आत्मबल बढाउने प्रेरणा हो, यो समाजमा शिक्षाप्रतिको बुझाइको नयाँ परिभाषा पनि हो।
शिक्षकको मेहनतको कदर
केवल विद्यार्थी मात्र होइन, तिनलाई सही मार्गमा डोर्याउने शिक्षकमाथि पनि उत्तिकै सम्मान प्रकट गरियो। विषयगत शिक्षकहरूलाई कदरपत्र र दोसल्ला सहित सम्मान गर्दै गोकुलगंगाले शिक्षकको भूमिकालाई औपचारिक मान्यता मात्र दिएन, उनीहरूको योगदानलाई संस्थागत सम्मानका रूपमा स्वीकार गर्यो।
युवा नेतृत्वको स्पष्ट दृष्टि
गाउँपालिका अध्यक्ष काजी बहादुर खड्का (दिनेश) र उपाध्यक्ष उषा देवी कार्कीको उपस्थितिले यो कार्यक्रम औपचारिक समारोहभन्दा बढी आत्मीय सहकार्यको संकेत बन्यो। अध्यक्ष खड्काले भन्नुभयो, “शिक्षा क्षेत्रमा सम्मानले मात्र होइन, हौसलाले पनि गुणस्तर बदलिन्छ।” उहाँको यो भनाइ केवल मन्तव्य थिएन, उहाँको कार्यशैलीको प्रतिबिम्ब थियो।
उपाध्यक्ष कार्कीले शिक्षा क्षेत्रलाई प्राथमिकतामा राखी भावी योजना निर्माणमा सामूहिकता र सहभागिताको अपेक्षा राख्नु, एक सचेत राजनीतिक नेतृत्वको प्रतिबिम्ब थियो।
सरकारी सवारी अस्वीकार गर्ने संवेदनशीलता
अध्यक्ष खड्का केवल शब्दमा होइन, कर्ममा पनि फरक छन्। सधैं भुइँमानै रहेर जनताको आवाज सुन्ने, सरकारी सवारी चढ्न नमानेर खर्चको बचत गर्ने, र नागरिकका पीडामा तिनकै घरदैलोमा पुग्ने उनको शैलीले नेतृत्वप्रतिको परम्परागत सोचलाई चुनौती दिएको छ।
चार वर्षसम्म बजेट ल्याउँदा पनि उनले आफूलाई होइन, शिक्षा, स्वास्थ्य, पूर्वाधार, स्वरोजगार, र समाजलाई प्राथमिकता दिँदै आएका छन्। जनप्रतिनिधिको कार्यालय ‘कमाउने थलो’ होइन, ‘सेवाको केन्द्र’ बन्नुपर्छ भन्ने उनको सोच गाउँपालिकाको नीति, कार्यक्रम र व्यवहारमा झल्किन्छ।
गोकुलगंगा: शैक्षिक नामुनातर्फको पाइला
गोकुलगंगा कहिल्यै चर्चामा नआउने एउटा शान्त गाउँपालिका थियो। तर पछिल्ला केही वर्षमा यसले लिएको गति, बनाएको नीति र दिएको सन्देशले यो पालिका अब एक शैक्षिक, सामाजिक र नैतिक पुनर्जागरणको केन्द्र बन्दैछ।
विद्यार्थीको सम्मान, शिक्षकको कदर र राजनीतिक नेतृत्वको प्रतिबद्धता — यी तीन आधारले भविष्यको उज्यालो यात्रा सुरु हुन्छ। यसपालिको गाउँसभा त्यही उज्यालोको घोषणा थियो।
गोकुलगंगा गाउँपालिका — एउटा यस्तो स्थान, जहाँ राजनीति केवल कुर्सीमा पुग्नको साधन होइन, समाजलाई बदल्ने माध्यम बनेको छ। जहाँ शिक्षा केवल पास हुने प्रक्रिया होइन, परिवर्तनको ऊर्जा बनेको छ।
आज गाउँको बालक सम्मानित हुँदैछ, शिक्षकले मञ्च चढ्दैछ, र अध्यक्ष सरकारी गाडी होइन, जनताको पाइलो पछ्याउँदैछ। यस्तो नेतृत्व, यस्तो सोच र यस्तो सम्मानले गोकुलगंगा मात्र होइन, सम्पूर्ण ग्रामीण नेपालले नयाँ दिशा पाउनेछ।
