सिन्धुली, असार ११
हरेक गाउँको समृद्धिको कथा योजना, बजेट र नेतृत्वको सोचमा लुकेको हुन्छ। यसपटक मरिण गाउँपालिकाले सार्वजनिक गरेको आर्थिक वर्ष २०८२/८३ को ७६ करोड १३ लाख ७८ हजार ८ सय रुपैयाँको बजेटले यही सोचलाई पुष्टि गरेको छ। झन्डै १३ करोड रुपैयाँले वृद्धि भएको यो बजेटले मरिणको सम्भावना, सपना र संकल्पको साझा दस्तावेज बनेको छ।
सोमबार सम्पन्न गाउँसभा बैठकमा उपाध्यक्ष विमला माझीले बजेट प्रस्तुत गर्नुभयो भने अध्यक्ष विमर्श (प्रख्यात) मोक्तानले नीति तथा कार्यक्रममार्फत मरिणको समग्र विकास योजनालाई औपचारिक स्वरूप दिनुभयो। तर त्यो भाषण मात्र थिएन, त्यो थियो — गाउँको वास्तविकता बुझ्ने, भोग्ने र बदल्ने नेतृत्वको प्रतिबिम्ब।
नीति होइन, निष्ठा बोकेको बजेट
अध्यक्ष मोक्तानले स्पष्ट गरेका छन् — “समृद्ध मरिण, सुखी मरिणबासी” नारालाई व्यवहारमा उतार्न अब शब्द होइन, संकल्प र कार्यान्वयन चाहिन्छ। त्यसैले बजेटको प्राथमिकता कृषि, पर्यटन, रोजगारी, शिक्षा, स्वास्थ्य र पूर्वाधार जस्ता जीवनका आधारभूत पाटाहरूमा केन्द्रीत गरिएको छ।
– कृषिमा बिना धितो सहुलियत ऋण, एक वडा–एक उत्पादन, रैथाने बाली संरक्षण र बीउ उत्पादन
– रोजगारीमा बाँझो जमिन उपयोग र सामूहिक उत्पादन
– पर्यटनमा मधुबनीमा प्याराग्लाइडिङ सेवा, पञ्चकन्या पोखरीको संरक्षण
– औद्योगिक क्षेत्र भालुमारामा स्थापना हुने औद्योगिक ग्राम
– सामाजिक दृष्टिकोणमा भूमिहीन र अव्यवस्थितलाई जग्गा उपलब्ध गराउने नीति
यी सबै योजनाले गाउँलाई आत्मनिर्भरता, सम्भावना र समृद्धिको मार्गमा लैजाने स्पष्ट संकेत दिएका छन्।
डिजिटल युगतर्फ गाउँको पाइला
मरिण अब डिजिटल युगमा प्रवेश गर्दैछ। प्रविधिको प्रयोग प्रशासनिक सेवा मात्र होइन, कृषि, शिक्षा, स्वास्थ्य र व्यवसायमा पनि उपयोग हुनेगरी नीति बनाइएको छ। डिजिटल प्रणालीमार्फत सेवा सहज, पारदर्शी र द्रुत बनाउने उद्देश्य कार्यक्रमहरूमा झल्किन्छ।
पर्यटनको नयाँ अध्याय : मधुबनीमा प्याराग्लाइडिङ
पर्वतीय भूगोल, मौलिक संस्कृति र ऐतिहासिक महत्व बोकेको मरिण अब पर्यटक आकर्षणको केन्द्र बन्दैछ। प्याराग्लाइडिङ सेवा सुरु गर्न मधुबनी क्षेत्रको पहिचानलाई नयाँ अर्थ दिइएको छ। साथै, पञ्चकन्या पोखरीको संरक्षण र प्रचारप्रसार गरी आन्तरिक पर्यटनलाई बलियो बनाउने योजना बनाइएको छ।
अध्ययनले प्रमाणित गरेको उत्कृष्ट नेतृत्व
मरिणका अध्यक्ष विमर्श मोक्तानको नेतृत्वलाई संघसंस्थाहरूले बागमती प्रदेशकै उत्कृष्ट जनप्रतिनिधिका रूपमा अध्ययन गरी मूल्यांकन गरेका छन्। यसको कारण पनि स्पष्ट छ — उहाँले जनताको समस्या आफ्नै समस्या ठान्नुहुन्छ।
उहाँको कार्यशैली राजनीतिक औपचारिकताभन्दा बढी मानविक, जिम्मेवार र भुइँबाट उठेको हो। गाउँको प्रगति, नीति निर्माण र कार्यान्वयनमा उहाँको प्रतिवद्धता शब्दमा होइन, परिणाममा देखिएको छ।
समृद्धिको बाटोमा सहकार्य र सहभागिता
अध्यक्ष मोक्तानको भनाइ, “नीति कार्यान्वयनमा सबैको सहयोग आवश्यक छ,” केवल कर्तव्य बोध होइन, सहभागी विकासको आह्वान हो। बजेट एकतर्फी निर्णय होइन, सामूहिक यात्राको नक्सा हो — जहाँ योजना कार्यान्वयनमा जनप्रतिनिधि, कर्मचारी, नागरिक र सरोकारवालाहरू सबैको भूमिका बराबर छ।
मरिण गाउँपालिकाको बजेट मात्र एक आर्थिक दस्तावेज होइन, यो गाउँको सम्भावना र सामर्थ्यको प्रमाण हो। यस्तो बजेट, यस्तो नेतृत्व र यस्ता प्राथमिकताले मरिण अब परिधिमा होइन, केन्द्रमा छ।
हिजो चुपचाप रहने मरिण, आज योजनाबद्ध बोलिरहेको छ। आज बजेट बोल्छ, नीति चाल्छ र नेतृत्व जिम्मेवारी बोक्छ। यदि यिनै योजनाहरू ईमानदारीपूर्वक कार्यान्वयन भए, मरिण एक दिन देशकै नमुना गाउँपालिका बन्न सक्ने सम्पूर्ण आधार बोकेको छ।
