मन्थली, १५ असार – “धान बालीमा सघनता : खाद्य सुरक्षा र आत्मनिर्भरता” भन्ने मूल नाराका साथ मन्थली नगरपालिकाले २२ औं राष्ट्रिय धान दिवस विशेष कार्यक्रमसहित मनाएको छ। नगरपालिकाको वडा नं–८, जगखनीटारस्थित खेतमा जनप्रतिनिधिदेखि सुरक्षाकर्मी, सरकारी कर्मचारी, पत्रकार र कृषकसम्मले हातेमालो गर्दै धान रोपेका छन्।
कार्यक्रमका प्रमुख अतिथि जिल्ला समन्वय समिति रामेछापकी प्रमुख चिना खड्का थिइन्। कार्यक्रममा जिल्लाका विभिन्न सहकारी संस्थाका प्रतिनिधिहरू, जिल्ला प्रहरी कार्यालयका प्रमुख भोला प्रसाद भट्ट, सशस्त्र प्रहरीका डिएसपी सूर्यप्रकाश शर्मा, सिंचाइ डिभिजन कार्यालयका प्रमुख सुरेश भुर्तेल, प्रधानमन्त्री कृषि आधुनिकीकरण परियोजना इकाइ प्रमुख थिरलाल गैरे, मन्थली नगरपालिकाका कर्मचारी, सञ्चारकर्मी तथा स्थानीयको उल्लेख्य सहभागिता रहेको थियो।
नगर प्रमुख लव श्रेष्ठ भन्छन् “हामी हिजो पनि धान रोप्थ्यौं, आज जनप्रतिनिधिको भूमिकामा रहेर अरूलाई पनि प्रेरित गर्न खेतमा उत्रिएका छौं। कृषिमा आत्मनिर्भरता कायम नगरी समृद्धि सम्भव छैन। म स्वयं कृषक हुँ, खेती मेरो चिनारी हो।”
प्रमुख अतिथि चिना खड्काले पनि आफू कृषक परिवारबाट आएको स्मरण गर्दै भनिन्, “आजको धान दिवस केवल परम्परा होइन, किसानप्रतिको सम्मान र उत्पादनप्रतिको प्रतिबद्धता हो। खेत बाँझो राख्न नहुने सन्देश दिन आज माटो छोएको छु। कृषकले उत्पादन नगरेसम्म देश भोकै बस्नुपर्छ। त्यसैले भगवान् हेर्ने हो भने कृषकलाई हेर्नुपर्छ।”
कार्यक्रम समन्वय मन्थली वडा नं–८ का अध्यक्ष गोपाल श्रेष्ठको नेतृत्वमा गरिएको थियो। उनले ८ वडाले धान रोपाइका लागि आवश्यक तयारी तथा समन्वय गरेको जानकारी दिए।
धान रोपाइँ केवल कर्म नभई संस्कृति हो भन्ने भावनासहित मनाइएको यस दिवसमा सहभागीहरूले खेतमा रमाइलो गीत–संगीतका साथ धान रोपेका थिए। आयोजकका अनुसार कृषिमा आधारित यस्ता गतिविधिले स्थानीय उत्पादनमा विश्वास बढाउने र आत्मनिर्भरताको यात्रामा एक ईँटा थप्ने अपेक्षा गरिएको छ।
