भोजपुर, २२ असार
भोजपुरको रामप्रसादराई गाउँपालिका–२ धोद्नेखानीमा एकै परिवारका चार जनाको ज्यान लिने जघन्य घटना भएको छ।
जिल्ला प्रहरी कार्यालय भोजपुरका अनुसार भोजपुर नगरपालिका–२ घर भएका ३० वर्षीय राजेन्द्र राईले गए राति आफ्नी १६ वर्षीया श्रीमती मनिषा गिरी, ६८ वर्षीय ससुरा बेलबहादुर गिरी, ४५ वर्षीया सासू मञ्जु गिरी र नौ वर्षीय सालो सपन गिरीको धारिलो हतियार प्रयोग गरी हत्या गरेका हुन्।
प्रहरी निरीक्षक दीपक श्रेष्ठका अनुसार घटना लगत्तै राई आफैँले प्रहरीलाई फोन गरी घटनाको जानकारी गराएका थिए। राईको पेटमा समेत गहिरो चोट देखिएको र प्रारम्भिक उपचारपछि थप उपचारका लागि बाहिर रेफर गरिएको प्रहरीले जनाएको छ।
घटनास्थलमा प्रहरी पुगेको र आवश्यक कानुनी प्रक्रिया पूरा गर्दै शवको मुचुल्का उठाउने कार्य भइरहेको छ। प्रारम्भिक अनुसन्धानमा घरायसी विवादका कारण घटना भएको हुन सक्ने वडासदस्य जीवन जर्गा मगरले जानकारी दिनुभयो। उनका अनुसार राई करिब एक हप्ता अघिदेखि ससुरालीमा बस्दै आएका थिए।
हाल घटनाबारे थप अनुसन्धान भइरहेको प्रहरीले जनाएको छ।
