सामाजिक सुरक्षा भत्ता नवीकरण गर्न परिचयपत्र अनिवार्य छैन : प्रजिअ रामेछाप

रामेछापका प्रमुख जिल्ला अधिकारी श्याम कृष्ण थापाले सामाजिक सुरक्षा भत्ता नवीकरणका क्रममा बालबालिका, आफैं हेर्न नसक्ने, अशक्त, अपांग वा दृष्टिविहीन नागरिकका लागि राष्ट्रिय परिचयपत्र अनिवार्य नभएको स्पष्ट गरेका छन्।
उनका अनुसार एकैपटक परिचयपत्र बनाउन आउने भिडका कारण सेवा प्रभावित हुने, मेसिनले काम नगर्ने लगायत समस्या देखिएकाले स्थानीय तहमै पुगेर फोटो खिच्ने व्यवस्था गर्ने तयारी भइरहेको छ। त्यसैले अहिले तत्काल परिचयपत्र बनाउनुपर्ने अवस्था छैन, उनले भने।
जिल्ला प्रशासन कार्यालयले पनि सामाजिक सुरक्षा भत्ता नवीकरण गर्न राष्ट्रिय परिचयपत्र अनिवार्य नभएको सूचना जारी गरेको छ। तर, कार्यालयमा भने परिचयपत्र बनाउन सर्वसाधारणको भिड कायम छ। पेन्सन वा सामाजिक भत्ता रोकिने डरले धेरैजना बिहानैदेखि लाइन बस्ने गरेका छन्।
एक कर्मचारीका अनुसार, राति ७ बजेसम्म पनि भीड घटेको छैन, भोलीका लागि पालो राखेर फर्कनुपर्ने अवस्था छ। सेवाग्राहीले गाउँमा नवीकरणका लागि चासो नदिइएको समेत गुनासो गरेका छन्।