काठमाडौँ: प्रधानमन्त्री केपी शर्मा ओलीले सूचनाको हकसहित सबै मौलिक हकहरूको कार्यान्वयनमार्फत परिपूर्ण लोकतन्त्र स्थापनामा सरकार प्रतिबद्ध रहेको बताएका छन्।
राष्ट्रिय सूचना आयोगद्वारा आयोजित १९औँ राष्ट्रिय सूचना दिवसको कार्यक्रममा सम्बोधन गर्दै प्रधानमन्त्री ओलीले लोकतन्त्र, स्वतन्त्रता र सूचनाको हकका लागि आफूले लामो संघर्ष गरेको स्मरण गरे। उनले संविधानमा मौलिक हकको प्रावधान सचेत रूपमा गरिएको भन्दै यसको प्रभावकारी कार्यान्वयन आवश्यक रहेको स्पष्ट पारे।
उनका अनुसार, आवश्यक नभएका वा कानुनले गोप्य राखेका विषयमा सूचनाको हक प्रयोग गर्नु उचित होइन। “व्यक्तिगत गोपनीयता, अनुसन्धानमा रहेका विषय वा समाज–राज्यसँग प्रत्यक्ष सरोकार नराख्ने सूचना माग्नु उचित अभ्यास होइन,” प्रधानमन्त्री ओलीले भने।
उनले सरकार र सूचना आयोगबीच अधिकारको कुनै तानातान नरहेको भन्दै मौलिक हकको कार्यान्वयनमा देखिएका चुनौतीलाई व्यवस्थापन गर्न आवश्यक रहेको उल्लेख गरे। साथै, सामाजिक सञ्जाललाई दर्ता र कर प्रणालीमा ल्याएर व्यवस्थित गर्ने तयारीमा सरकार स्पष्ट रहेको बताए।
कार्यक्रममा सूचनाको हकका अभियन्ता, उत्कृष्ट सूचना अधिकारी, पत्रकार र कर्मचारीलाई सम्मान र पुरस्कृत गरिएको थियो।
