मन्थली: रामेछापको लिखु तामाकोशी गाउँपालिका–७, हलेदेमा सडक मर्मतपछि यातायात एकतर्फी रूपमा सञ्चालनमा आएको छ।
प्रमुख जिल्ला अधिकारी श्यामकृष्ण थापाले जानकारी दिनुभयो कि पहिरोका कारण आज बिहानदेखि अवरुद्ध भएको सडक सञ्चालनमा आएको हो। काठमाडौँबाट दोलखाको चरिकोट र तामाकोशी हुँदै मन्थलीतर्फ जाँदै गरेका सवारीसाधन अवरुद्ध सडकका कारण बीच बाटोमै रोकिएका थिए। तर सडक एकतर्फी सञ्चालनमा आएपछि ती सवारीसाधन आ–आफ्नो गन्तव्यतर्फ अघि बढ्न थालेका छन्।
सडक अवरुद्ध हुनुको मुख्य कारण माथिबाट बगेर आएको लेदो र तामाकोशीले कटान गर्दा सडकमा आएको कटान हो। यसले गर्दा पुष्पलाल मार्गअन्तर्गत पर्ने चरिकोट–मन्थली सडक पटकपटक भासिने समस्या देखिन्थ्यो।
