काठमाडौं, ५ भदौ – नेपाली कांग्रेसका महामन्त्री गगनकुमार थापाले भारत र चीनबीच नेपाली भूमिसँग सम्बन्धित सम्झौताप्रति गम्भीर असहमति प्रकट गरेका छन्। प्रतिनिधिसभाको आजको बैठकमा बोल्दै उनले पछिल्लो सहमति आपत्तिजनक र अस्विकार्य रहेको बताएका हुन्।
थापाले भने, “हाम्रा दुई छिमेकी भारत र चीनले हाम्रो भूमिका बाहिर राखेर सम्झौता गरेको जानकारी हामीले पाएका छौँ। नेपाली कांग्रेस यसप्रति गम्भीर असहमति प्रकट गर्दछ। यो आपत्तिजनक र अस्विकार्य छ। नेपाल सरकारले यसबारे उठाएका सबै पहल समेटेर अगाडि बढाओस्। हामी यसका लागि आग्रह गर्न चाहन्छौँ।”
उनी आफ्ना पार्टीका महामन्त्री विश्वप्रकाश शर्माले अघि सारेको ६ बुँदे सुझावलाई पनि सरकारले ग्रहण गर्नुपर्नेमा जोड दिएका छन्।
थापाले सबै राजनीतिक दलहरू एकढिक्का भएर यो विषयमा संयुक्त रूपमा सन्देश दिनुपर्ने बताए। “उग्र राष्ट्रवादी हुने दिशामा नजाऔँ। हाम्रो भूमिमाथि आँखा लगाउने कुरा स्वीकार्य छैन। नेपालले यसको प्रतिवाद गर्नुपर्छ र त्यसका लागि स्पष्ट पोजिसन तयार गर्नु आवश्यक छ,” उनले भने।
थापाले यो विषयलाई घरेलु राजनीतिक लाभ वा उग्र राष्ट्रवादमा परिणत नगरी संवेदनशीलता र राष्ट्रिय एकता कायम गर्दै अघि बढाउनुपर्नेमा जोड दिएका छन्।
