काठमाडौं: प्रधानमन्त्री केपी शर्मा ओलीले देशमा नकारात्मक भाष्य मात्र सिर्जना हुँदै गएको भन्दै चिन्ता व्यक्त गरेका छन् ।
सिस्नुपानी नेपालले आयोजना गरेको ‘जुरुक्क कर्णाली’ कार्यक्रममा बिहीबार सम्बोधन गर्दै उनले भएका उपलब्धिहरूलाई बेवास्ता गरेर आलोचनामात्र गर्ने प्रवृत्ति बढेको बताए । “यदि सकारात्मक सोचका साथ अघि बढियो भने देश बनाउन समय लाग्दैन,” प्रधानमन्त्री ओलीको भनाइ थियो ।
आफूमाथि हुने व्यंग्यबारे उल्लेख गर्दै उनले केही नगर्नेले केही गर्नेलाई मात्रै आलोचना गर्ने परिपाटी देखिएको बताए । कर्णाली विकासमा आफूले गरेको योगदानलाई स्मरण गर्दै उनले “केही साथी मात्र अघि बढे हुन्छ, नत्र प्रतिस्पर्धा गर्नुपर्ने हुन्छ” भन्दै आफू कार्यकर्ताभन्दा काममार्फत मूल्यांकन गर्न तयार रहेको स्पष्ट पारे ।
प्राकृतिक ग्याँसको खोजीलाई विगतमा उपहास गरिएको तर अहिले पत्ता लागिसक्दा पनि त्यसको चर्चा नभएको भन्दै उनले गुनासो गरे । त्यस्तै विश्वविद्यालय निर्माण, स्वास्थ्य सुविधा र पूर्वाधार विकासजस्ता कामहरूलाई समेत बेवास्ता गरिएको उनको भनाइ थियो ।
कर्णाली विकासलाई विशेष प्राथमिकता दिँदै उनले भने, “बन्छ कर्णाली, बनाउनुपर्छ । उठ्छ कर्णाली । कमजोरी छन् भने सुधार गरेर अघि बढ्नुपर्छ ।”
