काठमाडौँ: परराष्ट्रमन्त्री डा. आरजु राणा देउवाले नेपाल र अमेरिकाबीचको सम्बन्ध विश्वासमा आधारित, दिगो र ऐतिहासिक भएको बताएकी छन्। अमेरिकाले नेपाली सेनालाई उपलब्ध गराएको दुईवटा स्काइ ट्रक (हेलिकोप्टर) आज काठमाडौँमा आयोजित समारोहमा हस्तान्तरण गर्दै, मन्त्री डा. राणाले यो सहयोग नेपालको र अमेरिकाको दिगो मित्रता र सहकार्यको प्रतीक भएको उल्लेख गरिन्।
डा. राणाले अमेरिकाले प्रजातान्त्रिक शासन प्रणाली सुदृढीकरण, मानवतावादी सहयोग, विपद् व्यवस्थापन, शान्ति स्थापना र क्षमता विकासमा नेपालको भरपर्दो विकास साझेदार भएको पनि बताइन्। उनले अमेरिकासँगको मित्रता र सहकार्य सधैं शान्ति, स्थायित्व र मानव सेवाको उद्देश्यमा केन्द्रित रहेको भन्दै अमेरिकी सरकार र जनतालाई निरन्तर सहयोगका लागि धन्यवाद दिइन्।
साथै मन्त्री डा. राणाले नेपाली सेनालाई निरन्तर समर्पण, अनुशासन, राष्ट्रियता र विश्व शान्ति तथा सुरक्षाप्रति अटूट प्रतिबद्धता प्रदर्शन गरेकोमा प्रशंसा गरिन्।
उक्त समारोहमा अमेरिकी राजदूत डिन आर. थम्पसनले परराष्ट्रमन्त्री डा. राणा, रक्षामन्त्री मानवीर राई र प्रधानसेनापति अशोकराज सिग्देललाई स्काइ ट्रक हस्तान्तरण गरेका थिए। यी हेलिकोप्टरहरू विपद् व्यवस्थापन, उद्धार कार्य र एयर एम्बुलेन्सको रूपमा प्रयोग गर्न सकिनेछन्।
