काठमाडौँ: नवनियुक्त प्रहरी महानिरीक्षक चन्द्रकुवेर खापुङले आज दर्ज्यानी चिन्ह् ग्रहण गरेका छन्। सिंहदरबारस्थित गृह मन्त्रालयमा आयोजित समारोहमा गृहसचिव गोकर्णमणि दुवाडीले उहाँलाई दर्ज्यानी चिन्ह लगाइदिएका हुन्।
समारोहमा गृहसचिव दुवाडीले खापुङलाई क्षमता, कार्यदक्षता र जेष्ठताको आधारमा नेपाल प्रहरीले सर्वोच्च पदमा नियुक्त गरेको जानकारी दिए। उहाँले प्रहरीको भूमिका मुलुकमा शान्ति, सुव्यवस्था, अपराध नियन्त्रण र सामाजिक न्याय कायम गर्न अत्यन्तै महत्वपूर्ण रहेको बताए।
सचिव दुवाडीले भने, “आम नागरिकलाई सुरक्षित छु भन्ने अनुभूति दिलाउनु हाम्रो कर्तव्य हो। आम नागरिकसँग नजिक रही उनीहरूको सुखदुःखमा साथी बन्न सक्नु प्रहरीको प्रभावकारिताको मापन हो। नेपाल प्रहरीको साख अझ मजबुत बनाउन खापुङ सफल हुनुहुनेमा हामी आशावादी छौँ। सबै दर्जाका प्रहरी कर्मचारीको मनोबल उच्च राखेर संगठनको उद्देश्य पूरा गर्न सकिन्छ।”
उहाँले समाजमा बढ्दो अपराधिक गतिविधिप्रति चिन्ता व्यक्त गर्दै भने, “अपराधका नयाँ श्रृङ्खला बढिरहेका छन्। यी सबै गतिविधि नियन्त्रण गरी समाजमा न्याय स्थापना गर्नु आवश्यक छ।”
नवनियुक्त महानिरीक्षक खापुङले पनि आफूले सकेको राम्रो गर्ने प्रतिबद्धता व्यक्त गर्दै भने, “सकेको राम्रो गर्छु, तर नराम्रो गर्नेछैन। प्रहरीको हित र संस्थागत सुधारलाई प्राथमिकतामा राखेको छु।”
उनले अपराध अनुसन्धानमा देखिएका चुनौतीमा ध्यान दिँदै कृत्रिम बुद्धिमत्ता (एआई), साइबर अपराध, क्रिप्टोसम्बन्धी अपराध र अन्तर्राष्ट्रिय अपराध नियन्त्रणमा प्रहरीले क्षमता विस्तार गर्नु आवश्यक रहेकोमा जोड दिए। तेह्रथुमको गाउँबाट सुरु भएको आफ्नो यात्रा प्रहरी महानिरीक्षकसम्म पुगेको स्मरण गर्दै खापुङले प्रहरीलाई आधुनिक प्रविधि र स्रोत–साधनले सुसज्जित बनाउनुपर्ने आवश्यकता औंल्याए।
