मन्थली, अविरल वर्षाका कारण पहिरो जाने जोखिम बढेपछि रामेछाप जिल्लाका प्रवेश नाकाहरूबाट रातिको समयमा सवारी आवतजावतमा रोक लगाइएको छ। जिल्ला प्रशासन कार्यालय रामेछापले असोज १७ गतेदेखि लगातार भइरहेको वर्षाको कारण सुरक्षाका दृष्टिले यस्तो निर्णय गरेको हो।
प्रमुख जिल्ला अधिकारी श्यामकृष्ण थापाका अनुसार रामेछापका सित्खा, सेलेघाट, खिम्ती र मिल्ती नाकामा साँझ ५ बजेदेखि बिहान ५ बजेसम्म सवारी साधनलाई कडाइका साथ रोक लगाइनेछ।
थापाले १९ गते आइतबारदेखि २४ गते शुक्रबारसम्मका लागि एम्बुलेन्स र अति आवश्यक सेवाका सवारी बाहेक सबै प्रकारका सार्वजनिक तथा निजी सवारी साधनको सञ्चालन निषेध गरिएको जानकारी दिए।
“सडकका विभिन्न स्थानमा पहिरो जाने सम्भावना अत्यधिक भएकाले जनसुरक्षाका लागि सवारी सञ्चालन अस्थायी रूपमा रोकिएको हो,” प्रमुख जिल्ला अधिकारी थापाले बताए।
जिल्ला प्रशासनले जारी गरेको विज्ञप्तिमा पनि अविरल वर्षाका कारण सडकको अवस्था जोखिमपूर्ण भएकाले सावधानी अपनाउन र अनावश्यक यात्रा नगर्न सर्वसाधारणलाई अनुरोध गरिएको छ।
