रामेछाप । लामो समयदेखि स्थगित हवाई सेवाको पुनःसञ्चालनको माग गर्दै रामेछापका युवाहरूले जिल्ला प्रशासन कार्यालयमा मागपत्र बुझाएका छन्। मन्थलीको शान्तिदिप युवा क्लबको नेतृत्वमा मंगलबार प्रमुख जिल्ला अधिकारी श्यामकृष्ण थापालाई तीन दिनभित्र काठमाडौं–रामेछाप–काठमाडौं उडान सुरु गर्न आग्रह गर्दै पत्र हस्तान्तरण गरिएको हो।
क्लबका अध्यक्ष सुरेश उदासका अनुसार बाढी–पहिरोका कारण सडक मार्ग असहज भएका बेला रामेछापबासीलाई हवाई सेवा नहुँदा समस्या भइरहेको छ। सात वर्षदेखि नियमित उडान नहुँदा स्थानीयले सुविधा पाउन नसकेको र आक्रोश बढेको जनाइएको छ।
प्रमुख जिल्ला अधिकारी थापाले युवाहरूको मागलाई सम्बन्धित निकायमा पठाउने प्रतिबद्धता जनाउँदै स्थानीयलाई नियमित हवाई सेवा दिनुपर्नेमा जोड दिएका छन्।
हाल रामेछाप विमानस्थलबाट नियमित उडान नहुँदा जिल्ला र स्थानीयवासीले कुनै प्रत्यक्ष लाभ लिन नसकेको बताइन्छ। यात्रु लक्षित नियमित उडान तालिका सार्वजनिक गरी दुईतर्फी उडान सञ्चालन गर्न स्थानीयले माग गरेका छन्। अझै स्थानीयको माग ब्यवास्था गरेमा विमान रोक्ने सम्मको चेतावनी दिएका छन।
