रामेछाप । लामो समयदेखि मन्थली बजारका युवाबीच सक्रिय रहँदै सामाजिक तथा व्यवसायिक क्षेत्रबाट पहिचान बनाएका युवा व्यवसायी सुरेश उदास अहिले राजनीतिको केन्द्रमा उदाएका छन्। नेकपा एमालेको भातृ संगठन नेपाल उद्योग तथा व्यवसायी महासंघ रामेछापको अध्यक्षमा उनी निर्विरोध निर्वाचित भएका छन्।
मन्थलीमा सम्पन्न तेस्रो वार्षिक साधारणसभा तथा दोस्रो जिल्ला अधिवेशनले उदासलाई सर्वसम्मत रूपमा अध्यक्षमा चयन गरेको हो। यसअघि उनी महासंघका उपाध्यक्ष थिए।
अधिवेशनले उपाध्यक्षमा ऋषि श्रेष्ठ र निरा तामाङ, सचिवमा जय मानन्धर, उपसचिवमा लक्ष्मी ढुंगेल, कोषाध्यक्षमा सरोज लामा र सह–कोषाध्यक्षमा मोहन कार्की लगायत १९ सदस्यीय कार्यसमिति निर्विरोध गठन गरेको छ।
व्यवसाय र सामाजिक सेवा दुबै क्षेत्रमा सक्रिय उदासले मन्थलीका युवाबीच रोजगारी, उद्यम र सहजीकरणका पहल गर्दै आएका थिए। यही सक्रियताले उनलाई राजनीतिक भातृत्व संगठनको नेतृत्वसम्म पुर्याएको हो।
अधिवेशनमा नेकपा एमालेका जिल्ला अध्यक्ष पुरूषोत्तम कडरिया, बागमती प्रदेश उद्योग, पर्यटन तथा वातावरण समितिका सभापति आनन्दकुमार श्रेष्ठ, प्रदेश अध्यक्ष पशुपतिवहादुर खड्का, मन्थली नगरपालिकाका प्रमुख लव श्रेष्ठलगायतका अतिथिहरूको उपस्थिति रहेको थियो।
कार्यक्रमको अध्यक्षता महासंघका अध्यक्ष पवन कठायतले गरेका थिए। वक्ताहरूले उदासको निर्वाचित नेतृत्वमा रामेछापको उद्योग, व्यवसाय र युवाको उद्यमशीलता अझै प्रगतिशील हुने अपेक्षा व्यक्त गरे।
