काठमाडौं: प्रधानमन्त्री सुशीला कार्कीले आज सातै प्रदेशका मुख्यमन्त्रीहरूसँग विशेष छलफल गर्ने भएकी छन्। प्रधानमन्त्रीको सचिवालयका अनुसार बैठक आज दिउँसो ४ बजे प्रधानमन्त्री निवास बालुवाटारमा बस्नेछ।
परिवर्तित राजनीतिक परिस्थितिमा संघीय र प्रदेश सरकारबीच समन्वय र सहकार्यलाई सुदृढ बनाउनका लागि यो बैठक बोलाइएको हो। बैठकमा मुलुकको समग्र अवस्था, आसन्न संसदीय निर्वाचनको तयारी र प्रदेशस्तरीय राजनीतिक तथा प्रशासनिक विषयमा विस्तृत छलफल हुने जनाइएको छ।
छलफलमा कोशी प्रदेशका मुख्यमन्त्री हिक्मतबहादुर कार्की, मधेश प्रदेशका जितेन्द्रप्रसाद सोनार, बागमतीका इन्द्रबहादुर बानियाँ, गण्डकीका सुरेन्द्रराज पाण्डे, लुम्बिनीका चेतनारायण आचार्य, कर्णालीका यामलाल कँडेल र सुदूरपश्चिमका कमलबहादुर शाह सहभागी हुनेछन्।
