तीन दिनदेखि बाढीपहिरोका कारण अवरुद्ध बिपी राजमार्ग आजदेखि सञ्चालनमा आएको छ। राजमार्गअन्तर्गत काभ्रेपलाञ्चोकतर्फ चौकीडाँडा–नेपालथोक सडकखण्डका विभिन्न स्थानमा पहिरो र लेदो खसेपछि यातायात पूर्ण रूपमा रोकिएको थियो।
डिभिजन सडक कार्यालय भक्तपुरका प्रमुख डिभिजनल सिनियर इञ्जिनियर सुमन योगेशका अनुसार अवरोध हटाउँदै र लेदो बगेका स्थानमा अस्थायी ‘डाइभर्सन’ निर्माण गरी आज बिहानदेखि राजमार्ग सञ्चालनमा ल्याइएको हो। काभ्रेपलाञ्चोकको रोशी गाउँपालिका–८ चारसयबेँसी क्षेत्रमा ५० मिटर डाइभर्सन बनाएपछि यातायात पुनः सुचारु भएको उनले बताए।
उनका अनुसार सुक्खा पहिरोले अवरोध हटाउन केही समस्या भए पनि शनिबारसम्म सुक्खा पहिरो रोकिएपछि राजमार्ग सञ्चालन गर्न सफल भएको हो। “सुक्खा पहिरो निरन्तर खस्दा काम रोकिएको थियो, अहिले स्थिर भएपछि डाइभर्सनमार्फत सडक सञ्चालनमा आएको छ,” उनले भने।
अविरल वर्षाका कारण कात्तिक १३ गतेदेखि राजमार्गका विभिन्न भागमा ढुङ्गा र लेदोसहितका पहिरो खसेका थिए। नमोबुद्ध नगरपालिका–६ चौकीडाँडा, बिरुवाडाँडा, डालाबेँसी, नार्के, चारसयबेँसी र घुमाउने क्षेत्रमा पहिरोले सडक अवरुद्ध भएपछि बिहीबार रातिदेखि यातायात रोकिएको थियो।
गत वर्षको असोजमा आएको बाढीपहिरोले समेत बिपी राजमार्गअन्तर्गत काभ्रेपलाञ्चोकको चौकीडाँडाबाट सिन्धुलीको बर्खेखोलासम्मको आठ किलोमिटर सडक बगाएको थियो। त्यसपछि खोलामा अस्थायी सडक निर्माण गरी एकतर्फी तथा दुईतर्फी सवारी सञ्चालन गर्ने व्यवस्था गरिएको थियो।
बाढीपहिरोका कारण राजमार्गको १६० किलोमिटरमध्ये सिन्धुलीको खुर्कोटदेखि नेपालथोकसम्म ३४ किमी र नेपालथोकदेखि धुलिखेलसम्म ५० किमी सडकमा ठूलो क्षति पुगेको छ। सडक कार्यालयका अनुसार क्षतिग्रस्त भागको स्थायी पुनर्निर्माणका लागि चार खण्डमा ठेक्का प्रक्रियामा अघि बढाइएको छ।
पूर्वी नेपाललाई छोटो दूरीमा जोड्ने महत्वपूर्ण राजमार्गका रूपमा बिपी राजमार्गबाट दैनिक हजारौँ सवारीसाधन आवतजावत गर्दै आएका छन्।
