काठमाडौँ: सञ्चार तथा सूचना प्रविधिमन्त्री जगदीश खरेलले गोँगबुस्थित नयाँ बसपार्कमा निःशुल्क इन्टरनेट सेवाको शुभारम्भ गरेका छन्।
काठमाडौँ उपत्यकाका प्रमुख सार्वजनिक स्थलहरूमा निःशुल्क वाइफाइ सुविधा विस्तार गर्ने योजनासहित असोज ६ गते पदभार ग्रहण गरेका मन्त्री खरेलले आज नयाँ बसपार्क पुगेर सेवा औपचारिक रूपमा सुरु गरेका हुन्।
कार्यक्रममा मन्त्री खरेलले नयाँ बसपार्कसहित उपत्यकाका १९ स्थानमा निःशुल्क इन्टरनेट जडान गरिएको जानकारी दिए। उनले भने, “पदबहालीका क्रममा गरेको प्रतिबद्धता पूरा गर्न आजबाट निःशुल्क इन्टरनेट सेवा सुरु गरेका हौँ। यसलाई क्रमशः उपत्यकाबाहिरका शहर र दुर्गम क्षेत्रमा पनि विस्तार गर्दै लैजानेछौँ।”
उनका अनुसार सरकारले राजधानी काठमाडौँसँगै देशका दुर्गम भूभागहरूमा पनि इन्टरनेट सेवा विस्तारको काम तीव्र बनाएको छ। “दार्चुला, बझाङ, जाजरकोट र मनाङको तिलिचो बेसक्याम्पसम्म इन्टरनेट पुगेको छ। अब सोलुखुम्बु, रामेछाप, रौतहट, म्याग्दी, बैतडीलगायत कमजोर नेटवर्क भएका क्षेत्रमा पनि प्रभावकारी सेवा पुर्याउन सरकार प्राथमिकताका साथ काम गरिरहेको छ,” मन्त्री खरेलले बताए।
उहाँले सातै प्रदेशका राजधानीहरूमा निःशुल्क इन्टरनेट सेवा विस्तार गर्ने सरकारको लक्ष्य रहेको उल्लेख गर्दै मुलुकका गाउँ–सहर र दुर्गम क्षेत्रसम्म टेलिफोन र इन्टरनेट पहुँच पुर्याउन आवश्यक तयारी भइरहेको बताए।
सञ्चार सचिव राधिका अर्यालले सूचना प्रविधि क्षेत्रमा भइरहेको तीव्र विकास, उपलब्ध स्रोतसाधन र नागरिक मागलाई ध्यानमा राख्दै देशभर इन्टरनेटको क्षमता विस्तार गरिने बताइन्।
नेपाल दूरसञ्चार प्राधिकरणका अध्यक्ष भूपेन्द्र भण्डारीका अनुसार सञ्चार मन्त्रालयको निर्देशनमा नयाँ बसपार्क, पशुपतिनाथ मन्दिर, त्रिभुवन अन्तर्राष्ट्रिय विमानस्थल र काठमाडौँका प्रमुख अस्पतालहरूमा निःशुल्क वाइफाइ सेवा विस्तार गरिएको छ।
नयाँ बसपार्क सञ्चालनकर्ता लोत्से बहुउद्देश्यीय प्रालिका अध्यक्ष इन्जिनियर दीपक कुँवरले वाइफाइ सेवाले यात्रु र सेवाग्राहीलाई ठूलो सुविधा पुगेको बताए।
प्राधिकरणका अनुसार यसअघि वाइफाइ उपलब्ध रहेका स्थानहरूमा मर्मत, गुणस्तर सुधार र क्षमता वृद्धि गरिएको छ भने तीन निर्माणाधीनसहित आठ स्थानमा नयाँ जडान गरिएको छ। ठूलोभर्याङ र एकान्तकुनास्थित यातायात व्यवस्था कार्यालयमा पनि स्थापना र क्षमतावृद्धिको काम भइरहेको छ।
मन्त्री खरेलको पहलमा अब नयाँ बसपार्क, भक्तपुर अस्पताल, भक्तपुर क्यान्सर अस्पताल, कीर्तिपुर अस्पताल र त्रिभुवन अन्तर्राष्ट्रिय विमानस्थलमा निःशुल्क र प्रभावकारी वाइफाइ सेवा सञ्चालन हुने भएको छ।
सेवाको दिगोपनाका लागि नेपाल टेलिकम, वर्ल्डलिङ्क र भायनेट कम्पनीले सहकार्य गर्ने भएका छन्।
यसैबीच मन्त्री खरेलले आजै त्रिवि शिक्षण अस्पताल महाराजगञ्ज, पशुपति मन्दिर र त्रिभुवन अन्तर्राष्ट्रिय विमानस्थलमा सञ्चालनमा रहेका इन्टरनेट सेवाको अनुगमन गर्ने कार्यक्रम रहेको मन्त्रालयले जनाएको छ।
